لکی مروت، ٹانک، ہنگو اور ڈی آئی خان میں دہشتگردی کے خاتمے کےلئے معاہدے طے

پشاور(ڈیلی اردو) لکی مروت، ٹانک، ہنگو اور ڈیرہ اسماعیل خان سمیت خیبر پختونخوا کے مختلف قبائلی اضلاع میں دہشتگردی کے مکمل خاتمے اور دیرپا امن کے قیام کے لیے اہم قبائلی معاہدوں کو حتمی شکل دے دی گئی ہے۔

ذرائع کے مطابق یہ معاہدے مقامی مشران، انتظامی نمائندوں اور سیکیورٹی اداروں کے باہمی مشاورتی عمل کے نتیجے میں طے پائے، جن کے تحت قبائل نے اس عزم کا اظہار کیا ہے کہ وہ کسی بھی شدت پسند یا اس کے سہولت کار کو نہ پناہ دیں گے، نہ خوراک اور نہ کسی صورت میں مدد فراہم کریں گے۔

معاہدے کی شقوں کے مطابق دہشتگرد عناصر کا عام آبادی میں داخلہ قطعی طور پر ممنوع قرار دیا گیا ہے، جبکہ کسی بھی خلاف ورزی پر سخت اقدامات کا عندیہ دیا گیا ہے۔ فریقین نے واضح کیا ہے کہ دہشتگردی میں ملوث افراد کے ساتھ کسی قسم کی نرمی یا مفاہمت ممکن نہیں ہو گی۔

امن معاہدوں کو قبائلی علاقوں میں ایک سنگ میل قرار دیا جا رہا ہے، جس کے ذریعے ریاست، مقامی افراد اور ادارے مشترکہ حکمت عملی کے تحت علاقے کو دہشتگردی کے سائے سے مکمل نجات دلانے کے لیے پرعزم نظر آتے ہیں۔