لکی مروت میں دہشتگردوں کے خلاف فضائی اور زمینی آپریشن شروع

لکی مروت (ڈیلی اردو) صوبہ خیبر پختونخوا کے ضلع لکی مروت میں سیکورٹی فورسز، سی ٹی ڈی اور پولیس نے مشترکہ طور پر دہشت گردوں کے خلاف فضائی اور زمینی آپریشن شروع کر دیا ہے۔ آپریشن میں کوبرا ہیلی کاپٹر حصہ لے رہے ہیں۔

سیکورٹی ذرائع کا کہنا ہے کہ آپریشن ضلع لکی مروت میں دہشت گردی کے بڑھتے ہوئے واقعات کی بناء پر شروع کیا گیا ہے۔ سکیورٹی فورسز نے ضلعی پولیس کے ہمراہ پولیس سٹیشن صدر، پولیس سٹیشن لکی مروت اور پولیس سٹیشن ڈڈیوالہ کی حدود میں واقع جنگل جسے مقامی زبان میں درگہ کہتے ہیں، دریائے کرم کے کنارے وانڈہ سعید خیل، احسان پور، کیچی قمر اور ملحقہ علاقوں میں دہشت گردوں کے خفیہ ٹھکانوں پر آپریشن شروع کیا گیا ہے۔

ذرائع کا کہنا ہے کہ وقفہ وقفہ سے فائرنگ اور دھماکوں کی آوازیں دور تک سنائی دے رہی ہیں اور ہیلی کاپٹر فضا میں پرواز کرتے رہے۔

واضح رہے کہ گزشتہ ہفتہ اسی علاقے میں پولیس اور دہشت گردوں کے درمیان شدید جھڑپیں ہوئی تھیں جن میں ایک پولیس وین راکٹ گولہ لگنے سے تباہ ہوگئی تھی۔ دریائے کرم کنارے واقع درگہ جنگل میں دہشت گردوں نے محفوظ پناہ گاہیں قائم کر رکھی ہیں جنہیں تباہ کرنے اور انہیں انجام تک پہنچانے کے لئے آپریشن شروع کیا گیا ہے۔

آپریشن کیلئے ضلع بھر میں تمام موبائل نیٹ ورک بند کر دئیے گئے ہیں۔ آخری اطلاعات تک دہشت گردوں کے خلاف آپریشن جاری تھا اور اس میں آرمی کے سپیشل دستے دن بھر کی کارروائی کے بعد سرچ آپریشن میں مصروف ہیں تاہم سرکاری سطح پر کسی جانی نقصان کی کوئی اطلاع نہیں مل سکی ہے۔