لکی مروت میں عسکریت پسندوں کی فائرنگ سے ایف سی اہلکار بیوی سمیت ہلاک

لکی مروت(ڈیلی اردو) خیبر پختونخوا کے ضلع لکی مروت کے نواحی گاؤں تترخیل نزد برخی کورونہ میں نامعلوم عسکریت پسندوں کی فائرنگ سے ایف سی بلوچستان کے ہیڈ کلرک معراج الدین اور ان کی اہلیہ ہلاک ہو گئے۔

پولیس حکام کے مطابق، معراج الدین اپنے گھر کے سامنے ایک دوست کے ہمراہ بیٹھے تھے کہ اچانک مسلح دہشت گردوں نے اندھا دھند فائرنگ شروع کر دی۔ فائرنگ کی آواز سن کر ان کی اہلیہ باہر آئیں تاکہ شوہر کو بچا سکیں، تاہم حملہ آوروں نے انہیں بھی نشانہ بنایا۔

معراج الدین موقع پر ہی جاں بحق ہو گئے، جبکہ ان کی اہلیہ کو اسپتال منتقل کیا گیا جہاں وہ بھی جانبر نہ ہو سکیں۔ پولیس نے جائے وقوعہ کو گھیرے میں لے کر شواہد اکٹھے کر لیے ہیں اور ملزمان کی تلاش شروع کر دی ہے۔