لیبیا کے سابق رہنما معمر قذافی کے بیٹے سیف الاسلام قذافی کمانڈو حملے میں ہلاک

طرابلس (ڈیلی اردو) لیبیا کے سابق رہنما معمر قذافی کے بیٹے سیف الاسلام قذافی کمانڈو حملے میں ہلاک ہو گئے ہیں۔ قذافی خاندان کے قریبی ذرائع اور لیبیا کی سرکاری خبر رساں ایجنسی لانا نے ان کی ہلاکت کی تصدیق کی ہے۔

لیبیا نیوز ایجنسی کے مطابق 53 سالہ سیف الاسلام قذافی کی موت کی تصدیق ان کی سیاسی ٹیم کے سربراہ نے کی ہے۔ جبکہ ان کے وکیل نے خبر رساں ادارے اے ایف پی کو بتایا کہ ایک ’’چار رکنی کمانڈو یونٹ‘‘ نے ان کے گھر پر حملہ کیا، جس کے نتیجے میں وہ گولی لگنے سے ہلاک ہو گئے۔ تاہم تاحال یہ واضح نہیں ہو سکا کہ اس حملے کے پیچھے کون تھا۔

عرب میڈیا رپورٹس کے مطابق سیف الاسلام قذافی کو ایک باغ میں فائرنگ کا نشانہ بنایا گیا، جس کے بعد حملہ آور موقع سے فرار ہو گئے۔ واقعے کے محرکات اور حملہ آوروں کی شناخت کے حوالے سے اب تک کوئی سرکاری تفصیلات سامنے نہیں آ سکیں۔

سیف الاسلام قذافی کو طویل عرصے سے اپنے والد معمر قذافی کا سیاسی جانشین سمجھا جاتا رہا ہے۔ انہوں نے 2021 میں لیبیا کے صدارتی انتخابات میں حصہ لینے کا اعلان کیا تھا، تاہم یہ انتخابات بعد ازاں غیر معینہ مدت کے لیے ملتوی کر دیے گئے تھے۔

لیبیا میں سکیورٹی اور سیاسی صورتحال کے تناظر میں سیف الاسلام قذافی کی ہلاکت کو ایک اہم پیش رفت قرار دیا جا رہا ہے۔