لیبیا کے ساحل کے قریب کشتی الٹنے سے 53 تارکین وطن ہلاک

نیو یارک (ڈیلی اردو) اقوامِ متحدہ کے ذیلی ادارے بین الاقوامی تنظیم برائے تارکینِ وطن (IOM) نے تصدیق کی ہے کہ لیبیا کے ساحل کے قریب تارکینِ وطن کی کشتی ڈوبنے کے سبب 53 افراد ہلاک یا لاپتا ہو گئے ہیں۔

IOM کے ترجمان کے مطابق یہ حادثہ چھ فروری کو لیبیا کے زراوہ کے قریب پیش آیا، جس کے بعد صرف دو نائیجرین خواتین کو ریسکیو کیا جا سکا۔

حادثے میں بچ جانے والی ایک خاتون نے بتایا کہ ان کے شوہر اس حادثے میں ہلاک ہو گئے، جبکہ دوسری خاتون کے دو بچے بھی لاپتا ہیں۔ اطلاعات کے مطابق یہ کشتی پانچ فروری کو لیبیا کے علاقے زاویہ سے روانہ ہوئی تھی اور اس میں زیادہ تر افریقی نژاد باشندے سوار تھے۔

IOM کے اعداد و شمار کے مطابق صرف جنوری میں کم از کم 375 مہاجرین وسطی بحیرۂ روم کے راستے ہلاک یا لاپتا ہو چکے تھے۔ ادارے نے کہا کہ انسانی اسمگلنگ اور غیر قانونی نقل و حمل کے نیٹ ورکس مہاجرین کا استحصال جاری رکھے ہوئے ہیں، اور وہ لیبیا سے یورپ کے ساحلوں تک غیر محفوظ کشتیوں میں انہیں لے جا کر منافع کماتے ہیں۔

گذشتہ برسوں میں لیبیا جنگ اور غربت سے فرار ہونے والے مہاجرین کے لیے ایک بڑا عبوری مرکز بن چکا ہے۔ 2011 میں معمر قذافی کی حکومت کے خاتمے کے بعد ملک بدامنی کا شکار ہے۔

IOM کے مطابق 2026 میں اب تک وسطی بحیرۂ روم کے راستے کم از کم 484 مہاجرین ہلاک یا لاپتا ہو چکے ہیں، جبکہ گزشتہ سال اس راستے پر 1,300 سے زائد افراد ہلاک یا لاپتا ہوئے تھے۔