مالاکنڈ میں سی ٹی ڈی کا آپریشن، 5 دہشت گرد ہلاک، 8 گرفتار

مالاکنڈ (ڈیلی اردو) خیبرپختونخوا کے ضلع مالاکنڈ میں انسداد دہشت گردی فورس (CTD) اور پولیس نے مہردے کے علاقے میں خفیہ اطلاع پر مشترکہ کارروائی کرتے ہوئے ایک خطرناک دہشتگرد گروہ کا قلع قمع کر دیا۔ کارروائی کے دوران پانچ دہشتگرد مارے گئے، دو زخمی ہوئے جبکہ آٹھ دہشتگردوں کو زندہ گرفتار کر لیا گیا۔

اسسٹنٹ کمشنر درگئی وحید اللہ خان کے مطابق یہ گروہ حالیہ دہشت گرد حملوں میں ملوث تھا اور علاقے میں بدامنی پھیلانے کی منصوبہ بندی کر رہا تھا۔ زخمی دہشتگردوں کو تحصیل ہیڈ کوارٹر ہسپتال منتقل کیا گیا ہے جبکہ گرفتار افراد سے مزید تفتیش جاری ہے۔

یاد رہے کہ گزشتہ ایک سال کے دوران خیبرپختونخوا اور بلوچستان میں دہشت گردی کی لہر میں تیزی آئی ہے، جس کے جواب میں سیکیورٹی اداروں کی کارروائیاں بھی مزید منظم ہو چکی ہیں۔ مالاکنڈ کا یہ آپریشن حالیہ دنوں کی کامیاب ترین کارروائیوں میں شمار کیا جا رہا ہے۔