مذہبی منافرت روکنے کیلئے سخت اقدامات اٹھانے پڑتے ہیں، وزیراعلیٰ پنجاب مریم نواز

لاہور (ڈیلی اردو ) وزیر اعلیٰ پنجاب مریم نواز نے کہا ہے کہ صوبے میں مذہبی منافرت اور انتشار کو روکنے کے لیے حکومت کو بعض اوقات سخت فیصلے کرنا پڑتے ہیں، کیونکہ فتنہ خواہ کسی بھی شکل میں ہو، اسے پھیلنے کی اجازت نہیں دی جا سکتی۔

لاہور میں علمائے کرام اور ائمہ مساجد میں اعزازیہ کارڈز تقسیم کرنے کی تقریب سے خطاب کرتے ہوئے وزیر اعلیٰ پنجاب نے اعلان کیا کہ صوبے بھر کے علمائے کرام، ائمہ کرام اور امام مساجد کو ماہانہ 25 ہزار روپے دیے جائیں گے۔ انہوں نے کہا کہ یہ رقم ایک چھوٹا سا نذرانہ اور تحفہ ہے، جبکہ اس کی ادائیگی کے لیے ایک آسان اور شفاف نظام تشکیل دے دیا گیا ہے۔

مریم نواز کا کہنا تھا کہ فروری کے آخر تک امام مساجد کے بینک اکاؤنٹس فعال ہو جائیں گے، تاکہ ادائیگی کا عمل براہِ راست اور شفاف رہے۔ انہوں نے کہا کہ علمائے کرام کی خدمت کرنا ان کے لیے باعثِ اعزاز ہے اور ائمہ کرام اور حکمرانوں کے درمیان مضبوط تعلق معاشرتی استحکام کے لیے ناگزیر ہے۔

وزیر اعلیٰ پنجاب نے کہا کہ علمائے کرام اور حکومت کے درمیان روابط میں خلل سے معاشرے میں بگاڑ پیدا ہوتا ہے۔ انہوں نے زور دیا کہ ملک میں اتحاد، امن اور ہم آہنگی کے فروغ میں علمائے کرام کا کردار کلیدی ہے۔

خطاب کے دوران انہوں نے کہا کہ بعض عناصر نے مذہب کے نام پر فتنہ اور نفرت کو فروغ دیا، جس کے نتیجے میں پرامن معاشرے کو نقصان پہنچایا گیا اور ستھرا پنجاب پروگرام کی گاڑیوں کو نذرِ آتش کیا گیا۔

مریم نواز نے واضح کیا کہ فتنہ کسی بھی شکل میں ہو، حکومت اسے ہرگز برداشت نہیں کرے گی۔ ان کا کہنا تھا کہ فتنے کی سرکوبی صرف حکومت کی ذمہ داری نہیں بلکہ علمائے کرام کا تعاون بھی ناگزیر ہے۔

انہوں نے کہا کہ ریاست اپنے شہدا کے خون کا حساب ضرور لے گی اور پنجاب کی سرزمین کو ہر فتنہ، ظالم اور مافیا کے لیے تنگ کر دیا گیا ہے۔ وزیر اعلیٰ کے مطابق مذہبی منافرت کے خاتمے کے لیے سخت اقدامات وقت کی ضرورت ہیں۔