مردان سے تحریک طالبان پاکستان کے انتہائی مطلوب 2 دہشت گرد گرفتار

مرادن (نمائندہ ڈیلی اردو) کاؤنٹر ٹیررازم ڈیپارٹمنٹ (سی ٹی ڈی ) نے خیبر پختونخوا کے ضلع مردان سے کالعدم تنظیم تحریک طالبان پاکستان (ٹی ٹی پی) کے انتہائی مطلوب دہشت گردوں کو گرفتار کرکے بارودی مواد برآمد کرنے کا دعویٰ کیا ہے۔

تفصیلات کے مطابق ترجمان محکمہ انسداد دہشت گردی کا کہنا ہے کہ سی ٹی ڈی نے مردان میں کارروائی کرتے ہوئے کالعدم تنظیم تحریک طالبان پاکستان کے 2 اہم دہشت گردوں کو گرفتار کرلیا ہے۔

ترجمان کا کہنا ہے کہ گرفتار دہشت گرد نہاد علی 14 اور فرہاد علی 4 مقدمات میں مطلوب ہے، گرفتار دہشت گردوں کے قبضے سے بارودی مواد اور اسلحہ بھی برآمد کیا گیا ہے۔

ملزمان سے ڈھائی کلو بارودی مواد، پرائما کارڈ، سیفٹی فیوز، ڈیٹو نیٹر، 2 دستی بم، پستول اور 6 موبائل فونز برآمد ہوئے۔

ترجمان کے مطابق صوبائی حکومت نے نہاد علی کے سر کی قیمت 70 لاکھ روپے مقرر کر رکھی تھی جبکہ فرہاد کے سر کی قیمت 40 لاکھ روپے مقرر کی گئی تھی۔

ملزمان کو مزید تفتیش کے لیے نامعلوم مقام پر منتقل کردیا گیا ہے۔