مردان میں سی ٹی ڈی کی کارروائی، کالعدم ٹی ٹی پی کا ٹارگٹ کلر ہلاک

نوشہرہ (ڈیلی اردو ) پاکستان کے شورش زدہ صوبے خیبر پختونخوا میں کاؤنٹر ٹیررازم ڈپارٹمنٹ (سی ٹی ڈی) کی کارروائی کے دوران کالعدم ٹی ٹی پی کا دہشت گرد حماد ظاہر ہلاک ہوگیا ہے۔

حکام کا کہنا ہے کہ سی ٹی ڈی مردان ریجن اور نوشہرہ پولیس نے مشترکہ کارروائی کی، علاقہ غائبانہ بابا میں سرچ اینڈ اسٹرائیک آپریشن کے دوران فائرنگ کا تبادلہ ہوا۔

سی ٹی ڈی کا کہنا ہے کہ کارروائی میں کالعدم تحریک طالبان پاکستان (ٹی ٹی پی) انتخاب عالم گروپ کا دہشت گرد حماد ظاہر ہلاک ہوگیا، مارا گیا دہشت گرد کانسٹیبل مقصود کی ٹارگٹ کلنگ میں ملوث تھا۔

 سی ٹی ڈی کا کہنا ہے کہ دہشت گرد پولیس کانسٹیبل مقصود کی ہلاکت کے علاوہ دہشت گردی، قتل، اقدام قتل، بھتہ خوری اور دیگر سنگین جرائم میں بھی سی ٹی ڈی مردان ریجن اور نوشہرہ پولیس کے لیے مطلوب تھا۔ دہشت گرد کے قبضے سے ایک کلاشنکوف، دو میگزین اور متعدد کارتوس برآمد ہوئے۔