مظفرگڑھ: مدرسے کے دو اساتذہ کی کم عمر طلبہ سے بدفعلی ، مقدمہ درج ،دونوں ملزمان گرفتار

مظفرگڑھ(ڈیلی اردو)جنوبی پنجاب کے ضلع مظفرگڑھ کی تحصیل علی پور کے موضع باقر شاہ میں واقع ایک دینی مدرسے میں چار کم عمر طلبہ کے ساتھ مبینہ بدفعلی کا افسوسناک واقعہ سامنے آیا ہے، جس پر پولیس نے فوری کارروائی کرتے ہوئے دو اساتذہ کو گرفتار کر لیا ہے۔ پولیس کے مطابق متاثرہ بچوں کی عمریں 11 اور 12 سال کے درمیان ہیں، جنہیں دینی تعلیم کے لیے مذکورہ مدرسے میں داخل کروایا گیا تھا۔ ابتدائی تفتیش کے مطابق ملزمان نے ڈھائی ماہ تک مسلسل ان بچوں کو مبینہ طور پر جنسی زیادتی کا نشانہ بنایا۔ بچوں نے بالآخر ظلم برداشت نہ کرتے ہوئے اپنے اہلخانہ کو صورتحال سے آگاہ کیا، جس پر یہ معاملہ بے نقاب ہوا۔

تین متاثرہ بچوں کے رشتہ داروں کی مدعیت میں تھانہ صدر علی پور میں مقدمہ درج کیا گیا۔ پولیس نے دونوں نامزد اساتذہ کو گرفتار کر کے ان کا اور متاثرہ بچوں کا میڈیکل کروانا شروع کر دیا ہے۔ مظفرگڑھ پولیس کے ترجمان وسیم خان گوپانگ کے مطابق ڈسٹرکٹ پولیس افسر (ڈی پی او) ڈاکٹر محمد رضوان احمد نے واقعے کا فوری نوٹس لیتے ہوئے ملزمان کے خلاف سخت قانونی کارروائی کی ہدایت کی۔ ترجمان کے مطابق مقدمے کی تفتیش جاری ہے اور جیسے ہی مزید تفصیلات سامنے آئیں گی، میڈیا اور عوام کو آگاہ کیا جائے گا۔ پولیس کا کہنا ہے کہ واقعے کی سنگینی کو مدنظر رکھتے ہوئے شفاف اور غیرجانب دارانہ تحقیقات کو یقینی بنایا جا رہا ہے۔