مظفر آباد: بلال مسجد کی جی پی ایس لوکیشن بھارت کو فراہم کرنے پر پاکستانی شہری گرفتار

مظفرآباد (ڈیلی اردو) پاکستان کے زیر انتظام کشمیر میں قائم بلال مسجد کی جی پی ایس لوکیشن انڈین خفیہ ایجنسی کو فراہم کرنے کے الزام میں ایک شخص گرفتار کر لیا گیا ہے۔

پولیس کے مطابق عبید جہانگیر نامی شہری کے خلاف آفیشل سیکرٹ ایکٹ کی دفعہ 3/3a کے تحت مقدمہ درج کیا گیا ہے۔ تھانہ صدر مظفرآباد میں درج ایف آئی آر میں کہا گیا ہے کہ راولاکوٹ کا رہائشی عبید جہانگیر دشمن ملک کی خفیہ ایجنسی کے لیے جاسوسی کر رہا تھا۔

یاد رہے کہ انڈیا نے چھ مئی کی رات مظفرآباد کی بلال مسجد پر میزائل داغ کر حملہ کیا تھا۔ مقدمے کے مطابق ملزم نے اہم حساس تنصیبات کی تصاویر اور ملکی خفیہ اطلاعات دشمن ملک کو فراہم کیں۔ 

ایف آئی آر کے مطابق عبید جہانگیر نے بلال مسجد کی جی پی ایس لوکیشن اور دیگر حساس مقامات کی تصاویر واٹس ایپ اور جدید ڈیوائسز کے ذریعے انڈین ایجنسی کو بھیجیں اور اس کے عوض بھاری رقوم وصول کیں۔

تھانہ صدر کے ایس ایچ او نوید الحسن نے ایف آئی آر درج ہونے اور عبید جہانگیر کی گرفتاری کی تصدیق کی۔ انہوں نے بتایا کہ مقدمے کی تفتیش کاونٹر ٹیررازم ڈیپارٹمنٹ کر رہا ہے اور ملزم کے دیگر ساتھی بھی گرفتار ہیں جن سے تفتیش جاری ہے۔