مغربی کنارے میں اسلامی جہاد کا کمانڈر اور غزہ میں اسرائیلی میجر سمیت 3 اہلکار ہلاک

یروشلم (ڈیلی اردو) اسرائیلی فوج نے ایک بیان میں کہا ہے کہ مغربی کنارے میں کی گئی ایک کارروائی میں فلسطینی عسکری گروہ اسلامی جہاد کے ایک اعلیٰ کمانڈر محمد عبد اللہ کو ہلاک کر دیا گیا ہے۔

اسرائیلی فورسز نے جمعے کی صبح مغربی کنارے میں قائم نور الشمس مہاجرین کیمپ میں کارروائی کی تھی۔

اسلامی جہاد غزہ کی عسکری تنظیم حماس کی حامی ہے اور دونوں مشترکہ طور پر کارروائیاں کرتی رہی ہیں۔

اسرائیل کی فوج نے مزید کہا ہے کہ غزہ کے شمالی علاقوں میں لڑائی کے دوران اس کے مزید تین اہلکار ہلاک ہوئے ہیں۔

بیان کے مطابق جمعرات کو ان اہلکاروں کی اموات اس وقت ہوئیں جب ان کی عسکریت پسندوں سے جھڑپ ہوئی۔

اسرائیلی فوج کا کہنا ہے کہ اس جھڑپ میں ایک میجر اور دو اہلکار مارے گئے۔

گزشتہ برس سات اکتوبر کے بعد غزہ میں شروع کی گئی زمینی کارروائی کے دوران اسرائیلی فوج کے 353 اہلکار ہلاک ہو چکے ہیں۔