مقبوضہ کشمیر میں بھارتی اقدام اقوام متحدہ پر حملہ ہے، کشمیریوں کو تنہا نہیں چھوڑیں گے: بلاول بھٹو

مظفر آباد (ڈیلی اردو ) چیئرمین پیپلز پارٹی بلاول بھٹو زرداری نے عید پر پیغام دیا ہے کہ ہم کشمیریوں کو تنہا نہیں چھوڑیں گے، میرے نانا نے کہا تھا کہ ہم کشمیر کے لیے ایک ہزار سال تک جنگ لڑیں گے۔

کشمیر میں ہونے والے ظلم پر پاکستان کی حکومت کو خاموش نہیں رہنے دیں گے۔
حکومت سے مطالبہ کرتے ہیں کہ بھارتی انتہاء پسندی کو ہر پلیٹ فارم پر بے نقاب کرے۔
چیئرمین پاکستان پیپلز پارٹی بلاول بھٹو زرداری کا عید کے موقع پر مظفرآباد، آزاد کشمیر میں خطاب
(1/3) pic.twitter.com/2uPiCueV3x

— PPP (@MediaCellPPP) August 12, 2019

بلاول بھٹو زرداری نے مظفر آباد میں میڈیا سے گفتگو کرتے ہوئے کہا کہ ہمارا مقابلہ گجرات کے قصائی سےہے وہ اب کشمیر کا قصائی بن چکا ہے۔

کشمیر میں میڈیا پر سخت پابندی ہے اور کشمیری رہنماؤں کو گرفتار کر لیا گیا ہے۔ اب ایسے حالات میں کشمیریوں کے حقوق کیلئے پاکستان کی حکومت آواز نہیں اٹھائے گئی تو کون اٹھائے گا؟

چیئرمین پاکستان پیپلز پارٹی بلاول بھٹو زرداری کا آزاد کشمیر میں پریس کانفرنس سے خطاب
(2/3) pic.twitter.com/kwYtL59VU3

— PPP (@MediaCellPPP) August 12, 2019

مقبوضہ کشمیرمیں بھارتی اقدام اقوام متحدہ پر حملہ ہے، ہم کشمیریوں کے ساتھ ہیں، کبھی کشمیریوں کو تنہا نہیں چھوڑیں گے۔

کشمیر کے مسئلہ پر قومی یکجہتی کا مظاہرہ کرنا حکومت کی ذمہ داری تھی مگر وزیر اعظم نے کچھ نہیں کیا اور صرف پوچھتے رہے کہ کیا کروں؟ تو پھر عوام تو مایوس ہو گی۔

چیئرمین پی پی پی بلاول بھٹو زرداری کا عید کے موقع پر مظفرآباد، آزاد کشمیر میں خطاب
(3/3) pic.twitter.com/PhDJt9q0Sx

— PPP (@MediaCellPPP) August 12, 2019

انہوں نے مسلم لیگ نون کی نائب صدر کی مریم نواز کی گرفتاری پر وزیرِ اعظم عمران خان پر تنقید کرتے ہوئے کہا کہ وزیراعظم جب اسمبلی میں کہتے ہیں میں کیا کروں توعوام مایوس تو ہوں گے، جب ہمیں متحد ہونے کا پیغام دینا تھا تو وزیراعظم نے مریم نواز کی گرفتاری کا فیصلہ دیا۔

انہوں نے اپنی پھوپی کی گرفتاری پر ردِ عمل دیتے ہوئے کہا کہ فریال تالپور کو رات 12 بجے گرفتار کرایا گیا۔

بلاول بھٹو زرداری نے کہا کہ پاکستان میں کوئی انتہا پسند مذہبی جماعت آجاتی تو بھارت کا رد عمل کیا ہوتا، مودی کو مبارک باد دینے کے بجائے اس کا مقابلہ کرنا چاہیے تھا، اس وقت مودی کو بے نقاب کرنا تھا جب اس نے کشمیر کے سیاستدانوں کو گرفتار کیا۔

بلاول بھٹو زارداری کے مظفر آباد پہنچنے پر آزاد کشمیر کے وزیراعظم راجا فاروق کا کہنا تھا کہ بلاول بھٹو کو کشمیریوں سے اظہارِ یکجہتی کے لیے مظفر آباد آنے پر خوش آمدید کہتا ہوں۔

انہوں نے کہا کہ نوازشریف نے بھی جیل سے کشمیریوں سے اظہار یکجہتی کا پیغام بھیجا ہے، بلاول صاحب، شاہ محمود صاحب، ظفر اقبال صاحب کشمیری آپ کی طرف دیکھ رہے ہیں۔