میانمار: چائے خانے پر فوجی فضائی حملہ، 18 شہری ہلاک، 20 زخمی

ینگون (ڈیلی اردو )  میانمار کی فوج کے گزشتہ ہفتے ایک چائے خانے پر فضائی حملے میں کم از کم 18 شہری ہلاک اور 20 زخمی ہوئے ہیں۔ مقامی دیہاتیوں اور آزاد آن لائن میڈیا نے پیر کو بتایا کہ یہ واقعہ جمعہ کے روز وسطی گاؤں ساگائنگ میں پیش آیا۔  

 متاثرین کی مدد کے لیے فوراً جائے وقوعہ پر پہنچنے والے ایک عینی شاہد نے ایسوسی ایٹڈ پریس کو بتایا کہ ہلاک ہونے والوں میں ایک پانچ سالہ بچہ اور دو اسکول ٹیچرز بھی شامل ہیں۔ حملہ اس چائے خانے پر ہوا جہاں درجنوں افراد میانمار اور فلپائن کے درمیان فٹبال ٹورنامنٹ ٹی وی پر دیکھنے کے لیے جمع تھے۔

یہ حملہ فوج کی ان متعدد اور جان لیوا فضائی کارروائیوں کا تازہ ترین حصہ ہے، جو ملک میں اس ماہ کے آخر میں ہونے والے انتخابات سے قبل جمہوریت نواز مسلح گروہوں کو نشانہ بنا رہی ہیں۔ ان حملوں میں اکثر شہری بھی مارے جاتے ہیں۔

میانمار میں یکم فروری 2021 کو آنگ سان سو چی کی منتخب حکومت کا تختہ الٹے جانے کے بعد حالات شدید انتشار کا شکار ہیں۔ فوجی بغاوت کے خلاف پُرامن احتجاج کو طاقت سے کچلنے کے بعد بڑی تعداد میں لوگ مسلح جدوجہد کی طرف گئے اور اب ملک کے وسیع حصے مسلح تصادم کی لپیٹ میں ہیں۔