نائجر: متعدد مقامات پر فائرنگ اور دھماکے، فوج نے مسلح حملہ پسپا کردیا

نائمی (ڈیلی اردو) نائجر کے دارالحکومت نائمی میں ہفتے کی صبح مختلف علاقوں میں فائرنگ اور دھماکوں کی آوازیں سنی گئیں، جبکہ اطلاعات کے مطابق سیکیورٹی فورسز نے متعدد مقامات پر ہونے والے مسلح حملوں کا مقابلہ کیا۔

خبر رساں اداروں کے مطابق نائمی کے مختلف علاقوں سے مسلسل فائرنگ کی آوازیں سنائی دیں، جبکہ بین الاقوامی دیوری ہمانی ایئرپورٹ اور صدارتی محل کے اطراف بھی دھماکوں اور شدید فائرنگ کی اطلاعات سامنے آئیں۔

مقامی ذرائع کے مطابق مسلح افراد نے ایئرپورٹ کے قریب واقع فوجی اڈے پر دھاوا بولنے کی کوشش کی۔ ذرائع کا کہنا ہے کہ صدارتی محل کے اطراف چیک پوسٹوں اور سرکاری ٹیلی وژن کی عمارت کو بھی مسلح افراد نے نشانہ بنایا۔

علاقائی تنازعات کے امور کے صحافی خلیل ولد اجدود کے مطابق یہ ایک مسلح حملہ تھا اور حملہ آوروں نے فوجی تنصیب میں داخل ہونے کی کوشش کی۔ تاہم واقعے سے متعلق سرکاری طور پر فوری طور پر کوئی تفصیلی بیان سامنے نہیں آیا۔

بعد ازاں نائمی سے موصول ہونے والی اطلاعات میں بتایا گیا کہ فوج اور سیکیورٹی اہلکاروں کی کارروائی کے بعد دھماکوں اور فائرنگ کا سلسلہ رک گیا۔

نائجر میں جولائی 2023 میں فوجی بغاوت کے بعد فوجی حکومت قائم ہے۔ ملک کی موجودہ حکومت نے مغربی ممالک سے تعلقات محدود کرتے ہوئے روس کے ساتھ روابط میں اضافہ کیا ہے۔ نائجر، مالی اور برکینا فاسو نے خطے میں سیکیورٹی تعاون کے لیے مشترکہ اتحاد بھی قائم کر رکھا ہے۔

ساحل کے اس خطے میں القاعدہ اور داعش سے وابستہ مسلح گروہوں کی سرگرمیاں بھی جاری ہیں اور نائجر میں رواں سال مختلف حملوں میں شہریوں سمیت متعدد افراد ہلاک ہوچکے ہیں۔