نائجر کے ہوائی اڈے پر دہشت گرد حملہ، 35 افراد ہلاک

نیامی (ڈیلی اردو ) نائجر کے حکام کے مطابق جمعرات کے روز ملک کے سب سے بڑے ہوائی اڈے دیوری ہامانی انٹرنیشنل ایئرپورٹ پر مسلح دہشت گردوں نے حملہ کیا، جس کے نتیجے میں 35 افراد ہلاک ہو گئے۔

وزارتِ دفاع کے مطابق ہلاک ہونے والوں میں 22 حملہ آور، 11 فوجی اہلکار اور 2 عام شہری شامل ہیں۔ اس کے علاوہ 4 حملہ آور زخمی ہوئے جبکہ 20 مشتبہ افراد کو گرفتار کر لیا گیا ہے۔

حکام کا کہنا ہے کہ حملہ آوروں نے جدید اسلحہ استعمال کیا جن میں آر پی جی-7 لانچرز، اے کے-47 رائفلیں، دھماکہ خیز مواد، گرینیڈ، مواصلاتی آلات اور بڑی مقدار میں گولہ بارود شامل تھا، جو بعد ازاں سکیورٹی فورسز نے قبضے میں لے لیا۔

عینی شاہدین کے مطابق دارالحکومت نیامی میں واقع ہوائی اڈے کے اطراف صبح نماز کے بعد شدید دھماکوں اور فائرنگ کی آوازیں سنی گئیں، جس سے علاقے میں خوف و ہراس پھیل گیا۔

یہ اس نوعیت کا دوسرا بڑا حملہ ہے، اس سے قبل رواں سال جنوری میں اسی ہوائی اڈے پر حملے میں 4 فوجی زخمی اور 20 حملہ آور ہلاک ہوئے تھے۔

جمعرات کی شام القاعدہ سے منسلک تنظیم “جماعت نصرت الاسلام والمسلمین” نے اس حملے کی ذمہ داری قبول کر لی۔