نائجیریا میں داعش کے ٹھکانوں پر امریکی فضائی حملے

ابوجا (ڈیلی اردو) نائجیریا کی حکومت کے مطابق صوبے سوکوٹو کے باؤنی جنگل میں داعش سے منسلک دو کیمپوں کو امریکی حمایت سے فضائی حملوں کا نشانہ بنایا گیا۔ ان حملوں کا ہدف ساحل کے علاقے سے نائجیریا میں داخل ہونے والے غیر ملکی جنگجو تھے۔

یہ کارروائی جمعرات کو صدر بولا احمد تینوبو کی منظوری کے بعد خلیجِ گنی میں موجود امریکی بحری پلیٹ فارمز سے کی گئی۔ نائجیریا کی وزارت اطلاعات کے مطابق حملوں سے قبل تفصیلی انٹیلی جنس، منصوبہ بندی اور نگرانی کی گئی تھی۔

امریکی صدر ڈونلڈ ٹرمپ نے سوشل میڈیا پلیٹ فارم ٹروتھ سوشل پر اعلان کیا کہ یہ کارروائی نائجیریا کی درخواست پر کی گئی، کیونکہ داعش کے عناصر خطے میں مسیحیوں کو نشانہ بنا رہے تھے۔

حکومتی بیان کے مطابق اس کارروائی میں امریکی ڈرونز استعمال کیے گئے جن کا ہدف داعش کے کیمپ تھے۔ حکام نے بتایا کہ یہ کیمپ نائجیریا میں بڑے دہشت گردانہ حملوں کی منصوبہ بندی کے لیے استعمال ہو رہے تھے۔ حملوں میں کوئی شہری ہلاک نہیں ہوا۔

سوکوٹو کی صوبائی حکومت نے بھی حملوں کی تصدیق کرتے ہوئے عوام سے پرسکون رہنے کی اپیل کی۔ اس کارروائی کو ابوجا اور واشنگٹن کے درمیان ایک غیرمعمولی مشترکہ عسکری اقدام قرار دیا جا رہا ہے، جو ساحل کے علاقے سے پھیلتی شدت پسندانہ کارروائیوں کے تناظر میں دونوں ممالک کے سیکیورٹی تعاون میں اضافے کی نشاندہی کرتا ہے۔

نائجیریا نے شدت پسند نیٹ ورکس کے خلاف مزید کارروائیوں کے عزم کا اعادہ بھی کیا ہے۔