نواز شریف عارضہ قلب میں مبتلا، العزیزیہ میں نئی درخواست ضمانت دائر

اسلام آباد (ڈیلی اردو) نواز شریف نے العزیزیہ ریفرنس میں 7 سال قید کی سزا معطل کر کے ضمانت پر رہا کرنے کیلیے اسلام آباد ہائیکورٹ میں نئی درخواست دائر کر دی۔ سابق وزیراعظم نے طبی بنیادوں پر ضمانت منظور کرنے کی استدعا کی ہے۔

نواز شریف کے وکیل خواجہ حارث نے طبی بنیادوں پر درخواست ضمانت دائر کی جس میں العزیزیہ ریفرنس میں 7 سال قید اور جرمانے کی سزا کیخلاف اپیل کا فیصلہ ہونے تک نواز شریف کو ضمانت پر رہا کرنے کی استدعا کی گئی ہے۔

درخواست میں کہا گیا ہے کہ نواز شریف عارضہ قلب میں مبتلا ہیں، میڈیکل رپورٹس بھی پیش کر دی ہیں، عدالت جتنے بھی مچلکے حکم کرے گی جمع کرا دیں گے۔

نواز شریف کی درخواست ضمانت میں نیب، جج احتساب عدالت اور سپریٹنڈنٹ کوٹ لکھپت جیل کو فریق بنایا گیا ہے۔ عدالت عالیہ میں نواز شریف کی سزا کیخلاف پہلی اپیل پر سماعت 18 فروری کو مقرر ہے۔