نوشہرہ: اکوڑہ خٹک میں پولیس موبائل پر شدت پسندوں کا حملہ، 3 اہلکار ہلاک

اسلام آباد (ش ح ط) صوبہ خیبرپختونخوا کے ضلع نوشہرہ کے علاقے اکوڑہ خٹک کے قریب پولیس موبائل پر شدت پسندوں کے حملے میں 3 اہلکار ہلاک ہوگئے۔

https://twitter.com/ShabbirTuri/status/1599061595484585984?t=ctBqpwHn3SzFFSlVSwazyw&s=19

ڈسٹرکٹ پولیس آفیسر (ڈی پی او) عمر خان کا کہنا ہے کہ جی ٹی روڈ پر اکوڑہ خٹک کے قریب پولیس موبائل پر حملہ ہوا، حملے میں تین اہلکار ہلاک ہوگئے۔

عمر خان کا کہنا ہے کہ پولیس کی بھاری نفری موقع پر پہنچ گئی اور سرچ آپریشن جاری ہے۔

ڈی پی او کا کہنا ہے کہ پولیس اہلکار معمول کی گشت پر تھے کہ 2 شدت پسندوں نے فائرنگ کی۔

واقعے کے بعد ملزمان جائے وقوع سے فرار ہونے میں کامیاب ہوگئے۔

پولیس کے مطابق ہلاک ہونے والوں میں ہیڈ کانسٹیبل منظور، کانسٹیبل امان اللّٰہ اور ڈرائیور ایاز خان شامل ہے۔

واقعے کے بعد پولیس کی بھاری نفری جائے وقوع پر پہنچ گئی اور شواہد اکھٹے کرکے تفتیش کا آغاز کردیا گیا۔

دوسری جانب وزیراعلیٰ خیبرپختونخوا نے واقعے کا نوٹس لے کر آئی جی سے رپورٹ طلب کی اور واقعے میں ملوث ملزمان کی گرفتاری کی ہدایت بھی جاری کیں۔

دوسری جانب کالعدم تنظیم تحریک طالبان پاکستان نے حملے کی ذمہ داری قبول کرلی۔