نوشہرہ میں کالعدم تحریک طالبان پاکستان کے 2 دہشت گرد ہلاک، 3 فرار

نوشہرہ (ڈیلی اردو) صوبہ خیبر پختونخوا ضلع نوشہرہ میں کاؤنٹر ٹررزم ڈپارٹمنٹ (سی ٹی ڈی) کے ساتھ جھڑپ میں کالعدم تنظیم تحریک طالبان پاکستان کے 2 دہشت گرد مارے گئے۔

https://twitter.com/ShabbirTuri/status/1623702322034659329?t=sQ3yRree3c3UakPPjiqBOg&s=19

کاؤنٹر ٹررزم ڈپارٹمنٹ (سی ٹی ڈی) مردان ریجن کو مصدقہ اطلاع ملی تھی کہ علاقہ تھانہ رسالپور کے علاقے مصری بانڈہ میں دہشت گردوں کا منظم گروہ دہشتگردی کی ایک بڑی کارروائی کی غرض سے علاقے میں موجود ہے۔

سی ٹی ڈی کی آپریشن ٹیم علاقے میں پہنچی تو اچانک مخالف سمت سے جوانوں پر ہینڈ گرینڈ پھینکے گئے اور اندھا دھند فائرنگ شروع ہوگئی جس پر سیکیورٹی اہلکاروں نے بھی جوابی فائرنگ کی۔

آپریشن کے دوران دو دہشتگرد ہلاک جبکہ انکے 2 سے 3 ساتھی فرار ہوگئے، ہلاک دہشتگردوں کی شناخت محمد ذیشان عرف عثمان اور سلمان عرف اماراتی کے ناموں سے ہوئی۔

دونوں دہشتگرد سی ٹی ڈی مردان کو پولیس پر حملوں اور بھتہ خوری سمیت متعدد سنگین مقدمات میں مطلوب تھے۔

ملزمان کانسٹبل بلال، کانسٹبل مزمل شاہ اور کانسٹبل زرمست کو ہلاک کرنے کے علاوہ سینئر میڈیکل ٹیکنیشن عبدالتواب کی ٹارگٹ کلنگ میں بھی ملوث تھے۔

پولیس کی بھاری نفری نے فرار ملزمان کی گرفتاری کیلئے علاقے میں سرچ آپریشن شروع کردیا ہے۔