وائٹ ہاؤس پر بڑے حملے کا منصوبہ ناکام، ایف بی آئی نے 5 افراد گرفتار کر لیے

واشنگٹن (ڈیلی اردو) امریکی محکمۂ انصاف نے کہا ہے کہ فیڈرل بیورو آف انویسٹگیشن (ایف بی آئی) نے وائٹ ہاؤس پر ہونے والے حملے کا منصوبہ ناکام بنا کر پانچ افراد کو گرفتار کر لیا ہے۔

امریکی محکمۂ انصاف نے کہا ہے کہ فیڈرل بیورو آف انویسٹگیشن (ایف بی آئی) نے وائٹ ہاؤس میں اتوار کو منعقد ہونے والے ایک یو ایف سی ایونٹ کو نشانہ بنانے کا منصوبہ ناکام بناتے ہوئے پانچ افراد کو گرفتار کر لیا ہے۔

محکمۂ انصاف کے مطابق منصوبے میں بارود سے بھرے ڈرونز کے ذریعے قریبی عمارتوں کو نشانہ بنانا اور اہم مقامات پر فائرنگ کرنا شامل تھا۔

تحقیقات کے دوران ایک مشتبہ شخص کو گزشتہ ہفتے ریاست اوہائیو سے گرفتار کیا گیا، جہاں تفتیش کاروں نے دیگر ملزمان کے ساتھ اس کے خفیہ پیغامات کا بھی جائزہ لیا۔

عدالتی دستاویزات کے مطابق ملزمان نے شدت پسند مذہبی اور حکومت مخالف نظریات کا اظہار کیا تھا۔

ایف بی آئی کے ڈائریکٹر کش پٹیل نے کہا کہ کئی ریاستوں میں کی گئی مشترکہ کارروائی کے دوران مبینہ حملے کے منصوبے کو بروقت ناکام بنایا گیا۔

گرفتار ملزمان کی شناخت 19 سالہ ٹائسن سی پراپر (اوہائیو)، 24 سالہ برائن عمر روآ، 32 سالہ مائیکل ایلن تھامس (کیلیفورنیا)، 32 سالہ ڈینیئل کے ایسکریج (میسوری) اور 31 سالہ ابراہام ہرموسیلو الواریز (نیبراسکا) کے ناموں سے ہوئی ہے۔

محکمۂ انصاف کے مطابق چار مختلف ریاستوں سے گرفتار کیے گئے تمام ملزمان پر قتل کی سازش کا مقدمہ درج کیا گیا ہے۔

عدالتی دستاویزات کے مطابق منصوبے میں ڈرونز کے ذریعے افراتفری پھیلانے، ہجوم کو سنائپرز کی جانب دھکیلنے اور بعد ازاں حملہ آوروں کے ایک اور گروپ کی جانب سے وائٹ ہاؤس کے داخلی دروازے پر دھاوا بولنے کی منصوبہ بندی شامل تھی۔

حکام کے مطابق اتوار کو وائٹ ہاؤس کے ساؤتھ لان میں منعقدہ صرف دعوت یافتگان کے لیے مخصوص یو ایف سی ایونٹ میں تقریباً 4,300 افراد شریک تھے، جبکہ قریب ہی سے تقریباً 85 ہزار افراد مقابلے دیکھ رہے تھے۔