ٹانک: جنڈولہ میں ایف سی قلعے پر کواڈ کاپٹر سے حملہ، مسجد کے صحن میں گولا گرنے سے نقصان نہیں ہوا

ٹانک (ڈیلی اردو) پاکستان کے صوبہ خیبر پختونخوا کے شورش زدہ ضلع ٹانک کی سب ڈویژن جنڈولہ میں فرنٹیئر کور (ایف سی) کے قلعے کو کواڈ کاپٹر ڈرون کے ذریعے نشانہ بنانے کی کوشش کی گئی، تاہم سکیورٹی اہلکاروں کے فوری ردعمل کے باعث کوئی جانی یا مالی نقصان نہیں ہوا۔

مقامی ذرائع کے مطابق 6 نومبر بروز جمعہ پیش آنے والے واقعے کے وقت ایف سی اہلکار مسجد میں نمازِ جمعہ ادا کر رہے تھے کہ حملہ آوروں نے کواڈ کاپٹر کے ذریعے قلعے پر ایک گولا فائر کیا، جو مسجد کے صحن میں آ گرا۔ خوش قسمتی سے گولے کے پھٹنے کے باوجود کوئی اہلکار یا شہری زخمی نہیں ہوا اور نہ ہی کسی عمارت کو نقصان پہنچنے کی اطلاع ہے۔

ذرائع کا کہنا ہے کہ سکیورٹی فورسز نے فوری کارروائی کرتے ہوئے حملے کا جواب دیا، جس کے نتیجے میں ڈرون کو واپس جانے پر مجبور ہونا پڑا۔ واقعے کے بعد علاقے میں سکیورٹی اقدامات مزید سخت کیے جانے کی اطلاعات ہیں، تاہم حملہ آوروں کی شناخت اور ان کے ٹھکانے سے متعلق تفصیلات سامنے نہیں آسکیں۔

واضح رہے کہ ضلع ٹانک اور اس کے گردونواح میں رواں سال کواڈ کاپٹر ڈرون حملوں کے متعدد واقعات رپورٹ ہو چکے ہیں۔ ساؤتھ ایشیا ٹیررازم پورٹل کی مانیٹرنگ کے مطابق یکم نومبر کو بھی ٹانک کی تحصیل جنڈولہ کے علاقے پائنگ میں ایک فوجی ڈرون گرائے جانے کی اطلاع سامنے آئی تھی، جبکہ اسی روز بنوں میں پولیس اہلکاروں کو بھی کواڈ کاپٹر حملے کا نشانہ بنایا گیا تھا۔ فروری 2026 میں ٹانک میں سکیورٹی چیک پوسٹوں پر ڈرون حملوں کے نتیجے میں جانی نقصان کے واقعات بھی رپورٹ ہوئے تھے۔