پاراچنار: افغانستان سے براستہ کرم اسلحہ اسمگلنگ کی کوشش ناکام

پاراچنار (نمائندہ ڈیلی اردو) صوبہ خیبر پختونخوا کے قبائلی ضلع کرم کے صدر مقام پاراچنار کے علاقہ تھانہ پیواڑ کی پولیس نے غیر ملکی ساخت کی ہیوی مشین گنیں اور دیگر خطرناک سنائپر گنوں سمیت تباہ کن اسلحہ کی بڑی کھیپ پاکستان سمگل کرنے کی کوشش ناکام بنادی اور ایک سمگلر کو گرفتار کر لیا۔

پیواڑ تھانہ کی پولیس نے پیواڑ تری منگل مین روڈ پر ڈاگو چیک پوسٹ کے نزدیک ایک ویگو پک اپ گاڑی سے دوہرے فرش میں چھپا کر سمگل کئے جا رہے اسلحے کی بھاری کھیپ برآمد کرلی۔

پاراچنار پولیس نے کامیاب کارروائی میں اسلحہ سمگلر ڈرائیور ملزم حمید اللہ ولد حکیم جان سکنہ تری منگل حال ٹنڈوری صدہ کو اپنے حراست میں لے لیا۔

سمگلر سے پکڑے گئے اسلحہ میں سے 2عدد زیڑاکئے ،1عدد زیڑاکئے نامکمل ، M-16A4 بیرل 9 عدد، M4 بیرل 6 عدد، M16 مشین گن بیرل 5 عدد، M-16 فرنٹ گریپ 3 عدد، M-4 بولٹ 2عدد، MM7.62HMG نامکمل 1عدد، SMG کارتوس 5323 عدد، M-4 کارتوس 2210 عدد، MG-1A-3 کارتوس 1000 عدد اور 11عدد میگزین M-4 شامل ہے۔

زیر حراست اسلحہ سمگلر کے خلاف تھانہ پیواڑ میں 15AA/17AA کے تحت مقدمہ درج کر لیا گیا اور ملزم نے ابتدائی پوچھ گچھ میں اسلحہ تری منگل سے لوئر کرم صدہ اور ضلع کے مختلف علاقوں کو سمگل کرنے کا اعتراف جرم کرلیا ہے۔

زیر حراست اسلحہ سمگلر کو مزید تفتیش کیلئے انوسٹی گیشن ٹیم کے حوالے کر دیا گیا ہے۔