پاراچنار: کرم میں سرحد پار سے حملہ، پاکستانی فوجی ہلاک

راولپنڈی (ک م) خیبرپختونخوا کے قبائلی ضلع کرم میں سرحد پار افغانستان سے دہشت گردوں کی جانب سے ہونے والی فائرنگ میں پاکستانی فوجی ہلاک ہوگیا۔

پاکستانی فوج کے شعبہ تعلقات عامہ (آئی ایس پی آر) سے جاری بیان کے مطابق بین الاقوامی سرحد پار افغانستان کے اندر سے دہشت گردوں نے ضلع کرم کے شہری علاقے خڑلاچی میں پاک فوج کے جوانوں پر فائرنگ کی۔

بیان مین بتایا گیا کہ پاک فوج کے سپاہیوں نے بھرپور جواب دیا اور باوثوق خفیہ اطلاعات کے مطابق فوجی اہلکاروں کی فائرنگ سے دہشت گردوں کو بھاری نقصان اٹھانا پڑا ہے۔

آئی ایس پی آر نے بتایا کہ فائرنگ کے تبادلے کے دوران پنجاب کے ضلع چنیوٹ سے تعلق رکھنے والے 27 سالہ سپاہی جمشید اقبال مادر وطن پر قربان ہوگئے۔

بیان میں کہا گیا کہ دہشت گردوں کی جانب سے پاکستان کے خلاف سرگرمیوں کے لیے افغانستان کی سرزمین استعمال کیے جانے کی پاکستان بھرپور مذمت کرتا ہے۔

آئی ایس پی آر نے بتایا کہ پاکستان توقع رکھتا ہے کہ افغانستان کی عبوری حکومت مستقبل میں اس طرح کی سرگرمیوں کی اجازت نہیں دے گا۔

مزید بتایا گیا کہ پاک فوج اپنی سرحدوں کی دہشت گردی کے ناسور کے خلاف دفاع کے لیے پرعزم ہے اور ہمارے بہادر جوانوں کی اس طرح کی قربانیوں سے ہمارا عزم مزید مضبوط ہوگا۔

اس سے قبل 20 ستمبر کو بھی ضلع شمالی وزیرستان میں افغانستان سے ہونے والی دہشت گردوں کی فائرنگ سے پاک فوج کا سپاہی ہلاک ہوگیا تھا۔

آئی ایس پی آر نے اپنے بیان میں کہا تھا کہ 19 ستمبر کو بین الاقوامی سرحد پار افغانستان کے اندر سے دہشت گردوں نے شمالی وزیرستان کے شہری علاقے دواتوئی میں پاکستانی فوجیوں پر فائر کھول دیا اور فائرنگ کے تبادلے کے دوران جعفر آباد سے تعلق رکھنے والے 34 سالہ سپاہی نذر محمد ہلاک ہوگئے۔

خیال رہے کہ 14 ستمبر کو بھی کرم کے علاقے میں افغانستان سے دہشت گردوں کی فائرنگ کے نتیجے میں پاک فوج کے 3 اہلکار ہلاک ہوگئے تھے۔