پاکستان اور افغانستان کا مسئلہ میں آسانی سے حل کر سکتا ہوں، امریکی صدر ٹرمپ

واشنگٹن (ڈیلی اردو) امریکی صدر ڈونلڈ ٹرمپ نے کہا ہے کہ پاکستان اور افغانستان کے درمیان جاری تنازعے کو اگر انہیں حل کرنا پڑے تو وہ آسانی سے کر سکتے ہیں۔ جمعے کو صحافیوں سے گفتگو کرتے ہوئے صدر ٹرمپ نے کہا کہ انہیں امریکہ کا انتظام بھی چلانا ہے، مگر ’مجھے جنگیں رکوانا بہت پسند ہیں اور میں نے لاکھوں زندگیاں بچائی ہیں۔‘

یہ بیان ایسے وقت میں سامنے آیا ہے جب 15 اور 16 اکتوبر کو پاکستان اور افغانستان کے درمیان جھڑپیں ہوئی تھیں۔ دونوں ممالک نے ایک دوسرے پر بھاری جانی اور مالی نقصان پہنچانے کا دعویٰ کیا۔ 

پاکستانی فوج نے تصدیق کی تھی کہ افغانستان سے کیے گئے حملوں میں سکیورٹی اہلکاروں سمیت 23 افراد ہلاک ہوئے، جبکہ پاکستان نے افغانستان میں 200 سے زائد طالبان اہلکاروں کے ہلاک ہونے کا دعویٰ بھی کیا تھا۔ تاہم ان دعووں کی آزاد ذرائع سے تصدیق نہیں ہو سکی۔

دو روزہ جھڑپوں کے بعد دونوں ممالک نے بدھ کو 48 گھنٹے کی جنگ بندی کا اعلان کیا تھا۔ 

افغان طالبان کے مرکزی ترجمان ذبیح اللہ مجاہد نے جمعے کی شام بی بی سی کو بتایا کہ اس جنگ بندی میں توسیع کر دی گئی ہے۔ تاہم پاکستان کی جانب سے جنگ بندی میں توسیع کی تصدیق یا ردعمل تاحال موصول نہیں ہوا۔

یہ صورتحال دونوں ممالک کے سرحدی علاقوں میں کشیدگی اور عدم اعتماد کو ظاہر کرتی ہے، جبکہ عالمی برادری بھی اس تنازع کی حتمی اور پائیدار حل تلاش کرنے کی کوشش کر رہی ہے۔