پاکستان اور یورپی یونین کا افغانستان سے دہشت گردی کے خاتمے کا مطالبہ

برسلز (ڈیلی اردو)  21 نومبر کو برسلز میں پاکستان اور یورپی یونین کے درمیان اسٹریٹجک مکالمے کا ساتواں دور منعقد ہوا، جس کی صدارت پاکستان کے نائب وزیراعظم اور وزیر خارجہ اسحاق ڈار اور یورپی یونین کی اعلیٰ نمائندہ برائے خارجہ امور کایا کالاس نے کی۔ اجلاس میں دوطرفہ تعلقات، 2019 کے اسٹریٹجک انگیجمنٹ پلان کے تحت تعاون اور مستقبل کے مشترکہ اہداف پر تفصیل سے بات ہوئی۔

اعلامیے کے مطابق دونوں فریقوں نے سیاسی، معاشی، انسانی حقوق، تجارت، مہاجرت، ترقیاتی منصوبوں اور یورپی یونین کے گلوبل گیٹ وے فریم ورک کے تحت تعاون بڑھانے پر اتفاق کیا۔ ایراسمس منڈس اور ہورائزن یورپ جیسے تعلیمی پروگراموں کے ذریعے علم اور تحقیق کے تبادلے کو مزید فروغ دینے پر بھی زور دیا گیا۔

بات چیت میں یورپی یونین نے پاکستان کے لیے جی ایس پی پلس اسٹیٹس کی اہمیت کا اعتراف کیا، جبکہ دونوں رہنماؤں نے اقوام متحدہ کے اصولوں، عالمی امن، کثیرالجہتی نظام اور قانون کی حکمرانی کے تحت بین الاقوامی تنازعات کے حل پر زور دیا۔ اجلاس میں غزہ کے مسئلے پر بھی بات ہوئی، اور دونوں نے دو ریاستی حل کی حمایت دہرائی۔

اعلامیے میں اکتوبر 2025 میں پاک افغان سرحدی کشیدگی کے تناظر میں علاقائی امن اور مذاکرات کے ذریعے مسائل کے حل پر زور دیا گیا۔ دونوں نے افغان عبوری حکام سے مطالبہ کیا کہ وہ دہشت گردی کے خاتمے کے لیے عملی اقدامات کریں۔ افغانستان کی بگڑتی معاشی صورتحال پر تشویش کا اظہار کیا گیا اور کہا گیا کہ افغانستان میں امن، استحکام اور ایک جامع سیاسی عمل ہی خطے کے مفاد میں ہے۔

یورپی یونین نے پاکستان کی گزشتہ 40 سال سے لاکھوں افغان مہاجرین کی میزبانی کو سراہا اور کہا کہ کسی بھی واپسی کا عمل محفوظ، باوقار اور عالمی قوانین کے مطابق ہونا چاہیے۔

آخر میں دونوں فریق اس بات پر متفق ہوئے کہ اسٹریٹجک مکالمے کا آٹھواں دور اسلام آباد میں منعقد کیا جائے گا۔