پاکستان نے لاہور اور کراچی کی فضائی حدود جزوی طور پر بند کر دیں

اسلام آباد (ڈیلی اردو رپورٹ) پاکستان نے سکیورٹی اور آپریشنل وجوہات کی بنا پر کراچی اور لاہور فلائٹ انفارمیشن ریجنز (FIRs) میں مخصوص فضائی حدود کو ایک ماہ کے لیے جزوی طور پر بند کرنے کا فیصلہ کیا ہے۔

سول ایوی ایشن اتھارٹی (سی اے اے) کے مطابق، یہ بندش یکم مئی سے 31 مئی تک روزانہ صبح 8 بجے سے شام 4 بجے تک نافذ العمل رہے گی، تاہم اتوار کے روز اس کا اطلاق نہیں ہو گا۔ جاری کردہ نوٹم (NOTAM) میں بتایا گیا ہے کہ یہ بندش 9 ہزار سے 25 ہزار فٹ کی بلندی پر موجود مخصوص فضائی راہداریوں پر لاگو ہو گی۔

سی اے اے کے ترجمان نے اس اقدام کو “آپریشنل وجوہات” سے تعبیر کیا ہے، تاہم ان وجوہات کی مزید وضاحت فراہم نہیں کی گئی۔ ایوی ایشن امور سے وابستہ ماہرین کا کہنا ہے کہ یہ فیصلہ سکیورٹی خدشات کے پیش نظر کیا گیا ہے، خاص طور پر حالیہ دنوں میں پاکستان اور بھارت کے درمیان بڑھتی ہوئی کشیدگی کے تناظر میں۔

دو روز قبل وفاقی وزیر اطلاعات عطا اللہ تارڑ نے بیان دیا تھا کہ بھارت اگلے 24 سے 36 گھنٹوں میں پاکستان پر حملہ کر سکتا ہے، جس کے بعد خطے میں فوجی اور سفارتی سطح پر غیر معمولی سرگرمیاں دیکھی گئیں۔

ایئر کموڈور (ر) ڈاکٹر عادل سلطان کے مطابق، ایسے حالات میں جب فوجی طیارے کسی مخصوص فضائی حدود میں سرگرم ہوں، تو مسافر یا دیگر سویلین طیاروں کی حفاظت کے لیے متعلقہ فضائی سیکٹرز کو بند کر دیا جاتا ہے۔

سول ایوی ایشن کے سابق افسران کا بھی کہنا ہے کہ جنگی یا کشیدہ حالات میں فضائی حدود کی جزوی بندش ایک احتیاطی تدبیر ہوتی ہے تاکہ مسافر طیاروں کو ممکنہ خطرات سے محفوظ رکھا جا سکے۔ عموماً جنگی طیارے 30 سے 37 ہزار فٹ کی بلندی پر پرواز کرتے ہیں، اور موجودہ بندش نسبتاً نچلی سطح کی پروازوں کو متاثر کرے گی۔

ذرائع کے مطابق بین الاقوامی ایئرلائنز اپنے روٹس پر نظرثانی کر کے متبادل راستوں کا انتخاب کر رہی ہیں تاکہ پروازوں کا معمول برقرار رکھا جا سکے۔

یاد رہے کہ اس سے قبل 27 فروری 2019 کو بھی پاکستان نے بھارت کے ساتھ کشیدگی کے دوران اپنی فضائی حدود کمرشل پروازوں کے لیے مکمل طور پر بند کر دی تھی، جس کا اثر ملکی اور بین الاقوامی پروازوں پر پڑا تھا۔

ماہرین کا کہنا ہے کہ اگر سکیورٹی صورتحال میں بہتری آتی ہے تو ان پابندیوں کو قبل از وقت ختم بھی کیا جا سکتا ہے۔