پاکستان کی انڈیا کو وارننگ: کارروائی کی تو بھرپور جواب دیا جائیگا

اسلام آباد (ڈیلی اردو/بی بی سی) پاکستان کے نائب وزیراعظم اسحاق ڈار کا کہنا ہے کہ ’پاکستان کشیدگی بڑھانے میں پہل نہیں کرے گا لیکن واضح کرتے ہیں اگر انڈیا نے کوئی کارروائی کی تو بھرپور جواب دیں گے۔‘

نائب وزیراعظم اسحاق ڈار پاکستانی فوج کے شعبہ تعلقاتِ عامہ کے ڈائریکٹر احمد شریف کے ہمراہ پریس کانفرنس سے خطاب کر رہے ہیں جہاں پاکستانی دفترِ خارجہ کے ترجمان شفقت علی خان بھی موجود ہیں۔

اسحاق ڈار کا کہنا ہے کہ ’پاکستان ہر قسم کی دہشت گردی کی مذمت کرتا ہے اور پہلگام حملے میں انسانی جانوں کی ہلاکت پر دُکھ ہوا ہے۔‘

اسحاق ڈار کا کہنا تھا کہ ’ہم نے پہلے بھی کہا ہے اور ایک بار پھر دہراتے ہیں کہ پاکستان کا پہلگام واقعے سے کوئی تعلق نہیں اور پاکستان اس کی مذمت کرتا ہے اور ہم نے اس واقعے کی غیر جانبدرانہ تحقیقات کی پیشکش کی ہے۔‘

اسحاق ڈار نے کہا کہ انڈیا بتائے کسی اہم شخصیت کے دورے پر ہی وہاں ایسے واقعات کیوں ہوتے ہیں؟ پہلگام واقعے پر انڈیا نے فوری طور پر پاکستان پر الزام لگا دیا۔‘

ان کا کہنا ہے کہ پہلگام واقعے کے بعد انڈیا نے غیر ذمہ دارانہ اور جارحانہ رویہ اختیار کیا۔ اسحاق ڈار کا کہنا تھا کہ انڈیا دوسروں پر انگلی اٹھانے کے بجائے اپنے اندرونی مسائل پر توجہ دے۔

انھوں نے مزید کہا کہ ’انڈیا جان بوجھ کر خطے میں حالات کو کشیدہ کر رہا ہے اور پاکستان موجودہ صورتحال کے تناظر میں بین الاقوامی دُنیا کے ساتھ رابطے میں ہے، پاکستان کی فوج الرٹ اور چوکس ہے اور انڈیا نے کوئی کارروائی کی تو بھرپور جواب دیا جائے گا۔‘

ان کا کہنا ہے کہ انڈیا یکطرفہ طور پر سندھ طاس معاہدہ معطل نہیں کر سکتا اور پاکستان کی قومی سلامتی کونسل کا واضح پیغام ہے کہ پانی روکنے کا اقدام جنگ تصور کیا جائے گا۔

اسحاق ڈار کا کہنا ہے کہ ہم خود دہشت گردی کا سامنا کر رہے ہیں اس لیے ہم سے بہتر اس درد کو کوئی نہیں سمجھ سجھ سکتا۔

انھوں نے کہا کہ ’پاکستان میں ہونے والی دہشت گردی کے واقعات انڈیا میں پلان کیے گئے اور پاکستان سمیت دنیا کے کئی ممالک میں لوگوں کو چن چن کر نشانہ بنانے کے پیچھے بھی انڈیا ملوث ہے اور اب وقت آ گیا ہے کہ دنیا کے ممالک اپنے شہریوں کے قتل پر انڈیا کا احتساب کریں۔‘