پاکستان کی ثالثی: امریکہ نے ایران پر حملے دو ہفتوں کیلئے مؤخر کر دیے

واشنگٹن/اسلام آباد (ڈیلی اردو رپورٹ) امریکی صدر ڈونلڈ ٹرمپ نے اعلان کیا ہے کہ پاکستان کے وزیرِ اعظم شہباز شریف اور آرمی چیف عاصم منیر کی درخواست پر وہ ایران کے خلاف مجوزہ فضائی اور عسکری کارروائی کو دو ہفتوں کے لیے مؤخر کرنے پر آمادہ ہیں۔ یہ فیصلہ اس شرط پر ہوگا کہ ایران آبنائے ہرمز کو فوری، مکمل اور محفوظ طریقے سے کھول دے۔

صدر ٹرمپ نے کہا کہ یہ ایک دو طرفہ جنگ بندی ہوگی اور امریکہ نے اپنے تمام فوجی اہداف حاصل کر لیے ہیں۔ 

ان کے بقول ایران کی جانب سے موصولہ 10 نکاتی تجویز مذاکرات کے لیے ایک قابلِ عمل بنیاد فراہم کرتی ہے، اور زیادہ تر اختلافی نکات پر دونوں ممالک کے درمیان اتفاق ہو چکا ہے۔ دو ہفتوں کی مہلت سے معاہدے کو حتمی شکل دینے میں مدد ملے گی۔

صدر ٹرمپ نے مزید کہا کہ بطور صدر اور مشرقِ وسطیٰ کے ممالک کی نمائندگی کرتے ہوئے اس دیرینہ مسئلے کے حل کے قریب پہنچنا ان کے لیے باعثِ اعزاز ہے۔ انہوں نے اس پیش رفت کو ایک اہم قدم قرار دیتے ہوئے کہا کہ یہ خطے میں طویل المدتی امن کے امکانات کو مضبوط کرے گا۔

پاکستان کے وزیرِاعظم شہباز شریف   نے اس فیصلے کو خوش آئند قرار دیتے ہوئے کہا کہ مشرقِ وسطیٰ میں جاری کشیدگی کے پُرامن حل کے لیے سفارتی کوششیں مستقل، مضبوط اور مؤثر انداز میں آگے بڑھ رہی ہیں، اور امکان ہے کہ یہ کوششیں مستقبل قریب میں ٹھوس نتائج تک پہنچیں۔

شہباز شریف نے اپنے پیغام میں صدر ٹرمپ سے درخواست کی کہ وہ ڈیڈ لائن میں دو ہفتوں کی توسیع کریں تاکہ سفارت کاری اپنا راستہ مکمل کر سکے، اور ایرانی حکومت سے اپیل کی کہ وہ نیک نیتی کے طور پر دو ہفتوں کے لیے آبنائے ہرمز کھول دے۔ انہوں نے تمام فریقین سے بھی اپیل کی کہ وہ دو ہفتوں کے لیے ہر جگہ جنگ بندی کریں تاکہ سفارت کاری کے ذریعے خطے میں دیرپا امن اور استحکام ممکن بنایا جا سکے۔

ماہرین کا کہنا ہے کہ اس دو ہفتوں کی مہلت سے ایران اور امریکہ کے درمیان طویل المدتی امن معاہدے کے حتمی پہلوؤں پر بات چیت کرنے کا موقع ملے گا، اور یہ خطے میں اقتصادی اور سفارتی تعلقات کی بہتری میں بھی اہم کردار ادا کر سکتی ہے۔