پشاور: خودکش حملے کے تین سہولت کاروں کی ضمانت مسترد، جیل بھیجنے کا حکم

پشاور(ڈیلی اردو) پشاور کی انسداد دہشتگردی عدالت نے خودکش حملے میں ملوث گرفتار تین سہولت کاروں کی ضمانت کی درخواستیں مسترد کرتے ہوئے انہیں جیل بھیجنے کا حکم دے دیا، عدالت کا فیصلہ سکیورٹی کیسز میں سخت رویے کا تسلسل قرار دیا جا رہا ہے۔

تفصیلات کے مطابق انسداد دہشتگردی عدالت (اے ٹی سی) میں تینوں ملزمان کی درخواستِ ضمانت پر سماعت ہوئی، جہاں پراسیکیوشن نے ٹھوس شواہد پیش کرتے ہوئے مؤقف اختیار کیا کہ ملزمان نے نہ صرف خودکش حملہ آور کے لیے جعلی پاکستانی شناختی کارڈ بنوایا بلکہ اسے پشاور میں قیام و رہائش بھی فراہم کی۔

پراسیکیوشن کے مطابق یہ حملہ 11 مئی کو تھانہ چمکنی کی حدود میں پیش آیا، جس میں سب انسپکٹر سمیت متعدد پولیس اہلکار جان سے ہاتھ دھو بیٹھے تھے۔ عدالت نے دلائل اور شواہد کا تفصیلی جائزہ لینے کے بعد تینوں سہولت کاروں کی ضمانت مسترد کر دی اور انہیں جیل منتقل کرنے کے احکامات جاری کر دیے۔