پشاور میں شدت پسندوں کی فائرنگ سے ایف سی اہلکار ہلاک، ناصر باغ روڈ پر دھماکا

پشاور (بیورو رپورٹ) پاکستان کے شورش زدہ صوبے خیبر پختونخوا کے دارالحکومت پشاور کے دو مختلف علاقوں میں جمعہ کے روز دہشت گردانہ واقعات پیش آئے۔

پشاور کے علاقے ریگی کے قبرستان کے قریب شدت پسندوں نے فرنٹیئر کور (ایف سی) کے اہلکار محمد امجد کو نشانہ بنایا اور فائرنگ کرکے ہلاک کر دیا۔ 

پولیس کے مطابق امجد، جو مغل زئی تحصیل ٹہکل بالا کے رہائشی تھے، موٹرسائیکل پر بیٹھے تھے کہ قریب سے گولیوں کا نشانہ بنے اور موقع پر ہی دم توڑ گئے۔

واقعے کے بعد قانون نافذ کرنے والے ادارے فوری طور پر جائے وقوعہ پر پہنچے۔ ایس پی وارساک ڈویژن سجاد حسین، ایس ایچ او ریگی پولیس اسٹیشن اور تفتیشی ٹیم نے معائنہ کیا اور چار عدد 30 بور کے خول برآمد کیے۔ 

ع

ینی شاہدین نے بتایا کہ دو حملہ آور موٹرسائیکل پر آئے، جن میں سے ایک نے کریم رنگ کا ہیلمٹ پہنا ہوا تھا اور دونوں کے پاس کھانے کے سامان سے بھرا ہوا شاپنگ بیگ تھا۔ تھوڑی دیر بیٹھ کر کھانے کے بعد ایک شخص نے پستول سے فائر کر کے اہلکار کو ہلاک کیا اور موٹرسائیکل پر فرار ہو گئے۔ 

ناصر باغ دھماکا

اسی روز ناصر باغ روڈ پر ایک زوردار دھماکہ بھی ہوا۔ پولیس کے مطابق شدت پسندوں نے پولیس گاڑی کو بارودی مواد سے نشانہ بنایا، تاہم کسی جانی نقصان کی اطلاع نہیں ہے۔ دھماکے کے بعد بھاری نفری موقع پر پہنچ گئی، علاقے کو سیل کر کے تحقیقات کا آغاز کیا گیا۔ بم ڈسپوزل اور کاؤنٹر ٹیررازم ٹیمیں تعینات کی گئیں تاکہ شواہد اکٹھے کیے جائیں اور دھماکے کی نوعیت معلوم ہو سکے۔

عہدیداروں کے مطابق، علاقے میں پہلے ہی حضرت امام حسین (ع) کے چہلم کے پیش نظر سیکورٹی سخت کی گئی تھی، اضافی گشت، چیک پوسٹیں اور نگرانی کے اقدامات کیے گئے تاکہ مذہبی تقریب کے دوران کسی ناخوشگوار واقعے سے بچا جا سکے۔ دھماکے کے بعد حکام نے شہر بھر میں ہائی الرٹ کی صورتحال برقرار رکھنے کا عزم ظاہر کیا ہے۔