پشاور میں پولیس اور دہشت گردوں کے درمیان فائرنگ، ایک دہشت گرد ہلاک

پشاور (نمائندہ ڈیلی اردو) پاکستان کے شورش زدہ صوبہ خیبرپختونخوا کے دارالحکومت پشاور میں ریگی ماڈل ٹاؤن اور جمرود سے ملحقہ سرحدی علاقوں میں پولیس اور دہشت گردوں کے درمیان فائرنگ کے تبادلے میں ایک دہشت گرد ہلاک ہوگیا، جبکہ اس کے دیگر ساتھی فرار ہونے میں کامیاب ہوگئے۔

کیپٹل سٹی پولیس آفیسر (سی سی پی او) پشاور ڈاکٹر میاں سعید کے مطابق گزشتہ شب ریگی ماڈل ٹاؤن اور جمرود سے ملحقہ علاقوں میں دہشت گردوں کی موجودگی کی اطلاع پر پولیس نے کارروائی کی، جس دوران دونوں جانب سے شدید فائرنگ کا تبادلہ ہوا۔

انہوں نے بتایا کہ پشاور پولیس نے بروقت اور مؤثر حکمت عملی اختیار کرتے ہوئے دہشت گردوں کا بھرپور مقابلہ کیا، جس کے نتیجے میں ایک دہشت گرد ہلاک ہوگیا۔ تاہم اس کے دیگر ساتھی اندھیرے کا فائدہ اٹھاتے ہوئے موقع سے فرار ہونے میں کامیاب ہوگئے۔

واقعے کے بعد پولیس نے علاقے کو گھیرے میں لے کر سرچ اینڈ کلیئرنس آپریشن شروع کر دیا، جبکہ حساس مقامات پر سیکیورٹی مزید سخت کر دی گئی ہے۔

سی سی پی او ڈاکٹر میاں سعید نے کہا کہ فرار ہونے والے دہشت گردوں کی گرفتاری کے لیے مختلف علاقوں میں کارروائیاں جاری ہیں اور انہیں جلد قانون کی گرفت میں لانے کے لیے تمام دستیاب وسائل بروئے کار لائے جا رہے ہیں۔

پولیس حکام کے مطابق کارروائی کے دوران علاقے سے شواہد اکٹھے کیے جا رہے ہیں، جبکہ ہلاک دہشت گرد کی شناخت اور اس کے ممکنہ نیٹ ورک کے بارے میں بھی تحقیقات جاری ہیں۔ انہوں نے کہا کہ پشاور اور اس کے نواحی علاقوں میں دہشت گرد عناصر کے خلاف انٹیلی جنس بنیادوں پر کارروائیاں بلا تعطل جاری رہیں گی۔