پنجاب: سیالکوٹ میں مبینہ پولیس مقابلے میں 4 ڈاکو ہلاک، دو فرار

سیالکوٹ (ڈیلی اردو) صوبہ پنجاب کے ضلع سیالکوٹ کے علاقے مظفر پور میں مبینہ پولیس مقابلے کے دوران 4 ملزمان ہلاک جبکہ دو فرار ہوگئے۔

پولیس کے مطابق 6 نامعلوم ڈاکوؤں نے سیالکوٹ کے تھانہ اگوکی کے علاقے مظفر پور کے قریب ناکہ لگا کر شہری آصف کو روک کر اسلحہ کی نوک پر اس سے 25 ہزار روپے کی نقدی و موبائل فون چھین لیا اور فرار ہوگئے، تعاقب کرنے والی پولیس پارٹی پر بھی ڈاکوؤں نے فائرنگ کردی اور اس دوران ملزمان کے اپنے ساتھیوں کی فائرنگ سے چار ڈاکو ہلاک ہوگئے اور 2 ڈاکو موقعہ سے فائرنگ کرتے ہوئے فرار ہوگئے جو تعاقب کے باوجود گرفتار نہ ہوسکے۔

ایس ایچ او ملک ندیم منور کے مطابق جاں بحق ہونے والی ملزمان کی شناخت کیلئے انہیں رکھا گیا ہے تاہم جلد ہی ملزمان کی شناخت ہو جائے گی اور فرار ہونے والے ڈاکوؤں کی شناخت ہوتے ہی انہیں گرفتار کر لیا جائے گا۔

پولیس کے مطابق دو روز قبل خواجہ صفدر روڈ پر کچہری کے ڈیوٹی مجسٹریٹ کی عدالت میں پیشی کے بعد سرکاری تھانہ مراد پور پولیس کی گاڑی پر واپس تھانے جاتے ہوئے چھ مسلح ڈاکوؤں نے حملہ کر کے ڈکیتی اور پانچ افراد کے قتل میں ملوث تین گرفتار ملزمان عمران، سفیان اور تعظیم کو چھڑوا لیا تھا اور سرکاری اہلکار سے ایس ایم جی رائفل چھین کر فرار ہو گئے تھے اور حالیہ واقعہ میں اپنے ہی ساتھیوں کی فائرنگ سے چار ڈاکوؤں کی ہلاک اور دو فرار ہو جانے کے واقعہ میں چھینی جانے والی ایس ایم جی رائفل برآمد کرلی گئی۔

فرار ہونے والے ڈاکوؤں کی تلاش کیلئے پولیس کے ناکے اور تلاشی جاری ہے۔