پنجاب سے چار مبینہ دہشت گرد گرفتار

لاہور (اے ڈی شہزاد) کاؤنٹر ٹیررازم ڈیپارٹمنٹ (سی ٹی ڈی) پنجاب نے صوبے بھر میں مختلف کارروائیوں کے دوران چار مبینہ دہشت گردوں کو گرفتار کرلیا۔

سی ٹی ڈی کے ترجمان کے مطابق دہشت گردوں کے خلاف کارروائیاں خفیہ طور پر ملنے والی معلومات پر کی گئیں۔

آپریشن میں پکڑے جانے والوں کی شناخت علی رضا، علی اکبر، ظاہر محمود اور نیک محمد کے ناموں سے کی گئی ہے۔ آپریشن کے دوران 9 مشتبہ افراد سے پوچھ گچھ بھی کی گئی۔

ترجمان کے مطابق گرفتار افراد سے ممنوعہ لٹریچر اور دیگر اشیاء برآمد کی گئیں، جب کہ ایک ہفتے کے دوران سی ٹی ڈی نے 327 آپریشنز میں 14 ہزار سے زائد افراد کو چیک کیا گیا۔

ترجمان نے یہ بھی بتایا کہ 42 مشتبہ افراد کو گرفتار کرتے ہوئے 39 ایف آئی آرز درج کی گئی ہیں۔