پنجاب: میانوالی میں سی ٹی ڈی کارروائی، دو دہشت گرد ہلاک، اسلحہ و بارودی مواد برآمد

میانوالی (نمائندہ ڈیلی اردو ) پاکستان کے صوبہ پنجاب کے ضلع میانوالی کے علاقے کندیاں میں سی ٹی ڈی کی ایک خفیہ اطلاع پر مبنی کارروائی کے دوران دو دہشت گرد ہلاک ہو گئے۔

کاؤنٹر ٹیررازم ڈیپارٹمنٹ (سی ٹی ڈی) کے ترجمان کے مطابق یہ انٹیلی جنس بیسڈ آپریشن تھا، جس میں فورسز کو دہشت گردوں کی موجودگی کی اطلاع ملی تھی۔ کارروائی کے دوران دہشت گردوں سے شدید فائرنگ کا تبادلہ ہوا، جس کے نتیجے میں دو دہشت گرد موقع پر ہی ہلاک ہو گئے، جبکہ چھ دہشت گرد اندھیرے کا فائدہ اٹھا کر فرار ہو گئے۔

سی ٹی ڈی ترجمان کے مطابق ہلاک دہشت گردوں کے قبضے سے رائفلیں، دستی بم، بارودی مواد، گولیاں اور دیگر اسلحہ برآمد ہوا ہے۔ فرار دہشت گردوں کی تلاش کے لیے علاقے میں سرچ آپریشن جاری ہے اور قریبی مقامات کی نگرانی مزید سخت کر دی گئی ہے۔