پنجاب: ڈیرہ غازی خان میں لکھانی چیک پوسٹ پر پاکستانی طالبان کا بڑا حملہ ناکام، 4 دہشت گرد ہلاک

واشنگٹن (ش ح ط) صوبہ پنجاب کے ضلع ڈیرہ غازی خان کے خیبرپختونخوا بارڈر پر واقع سرحدی چوکی پر کالعدم تحریک طالبان پاکستان (TTP) سے تعلق رکھنے والے دہشت گردوں نے بڑا حملہ کیا، جسے پولیس کی جوابی کارروائی میں ناکام بنا دیا گیا۔

ڈیلی اردو کے مطابق خیبرپختونخواہ بارڈر سے متصل تونسہ کے علاقے میں واقع لاکھانی چیک پوسٹ حملے میں دہشت گردوں کی تعداد 20 سے 25 کے درمیان تھی، جنہوں نے رات گئے اچانک چیک پوسٹ کو نشانہ بنایا۔ پولیس، سی ٹی ڈی اور دیگر قانون نافذ کرنے والے اداروں کی بروقت اور منظم جوابی کارروائی کے نتیجے میں چار دہشت گرد ہلاک ہو گئے جبکہ ان کے دیگر ساتھی فرار ہونے میں کامیاب ہو گئے۔

ہلاک ہونے والے دہشت گردوں سے بھاری مقدار میں اسلحہ، دستی بم اور دیگر سامان برآمد کر لیا گیا ہے۔

پولیس ترجمان کے مطابق علاقے کو فوری طور پر سیل کر کے سرچ آپریشن شروع کر دیا گیا ہے، تاکہ فرار ہونے والے دہشت گردوں کو گرفتار کیا جا سکے۔

ذرائع کے مطابق حملہ آوروں کا تعلق کالعدم تحریک طالبان پاکستان سے تھا اور انہوں نے ممکنہ طور پر بارڈر پار سے منظم ہو کر حملہ کیا۔ واقعے کے بعد سیکیورٹی مزید سخت کر دی گئی ہے۔

یاد رہے کہ رواں ماہ کے آغاز میں بھی اسی علاقے میں سحری کے وقت ایک پولیس چیک پوسٹ پر حملہ کیا گیا تھا، جسے سیکیورٹی فورسز نے ناکام بنا دیا تھا۔ حالیہ واقعہ شدت پسندوں کی جانب سے سرحدی علاقوں میں دوبارہ منظم ہونے کی کوششوں کا تسلسل قرار دیا جا رہا ہے۔