پنجگور میں سیکورٹی فورسز کی گاڑی کے قریب دھماکا، 2 افراد ہلاک، 3 اہلکار زخمی

کوئٹہ (ڈیلی اردو) صوبہ بلوچستان کے ضلع پنجگور کے ایک بازار میں دھماکا ہوا ہے۔ دھماکے کے نتیجے میں 2 افراد ہلاک اور سیکیورٹی فورسز کے تین اہلکار زخمی ہوگئے ہیں۔

تفصیلات کے مطابق پنجگور کے مرکزی بازار چتکان میں سیکیورٹی فورسز کی گاڑی پر موٹر سائیکل پہ نصب بارودی مواد کے دھماکہ کے نتیجے میں دو راہگیر ہلاک جبکہ تین ایف سی اہلکار زخمی ہوئے ہیں۔

https://twitter.com/ShabbirTuri/status/1454760376860647426?t=CU2AMEZEep0t5BWcsdDxaw&s=19

ہلاک ہونے والے دو راہگیروں کی لاشیں سول ہسپتال پنجگور منتقل کردی گئی جن میں ایک کی شناخت نور اللہ کے نام سے ہوئی ہے جو پنجگور کا رہائشی ہے۔

پولیس کے مطابق دھماکہ ریموٹ کنٹرول ڈیوائس سے کیا گیا۔ پولیس اور سیکیورٹی اداروں نے علاقے کو گھیرے میں لے لیا۔

وزیراعلیٰ بلوچستان میرعبدالقدوس بزنجو نے پنجگور دھماکے کی مذمت کی ہے۔طانہوں نے دھماکے میں 2 افراد کی ہلاکت پر دکھ اور افسوس کا اظہار کرتے ہوئے کہا کہ دہشتگردانہ کارروائیوں کا مقصد بے چینی اور بد امنی پیدا کرنا ہے۔

خیال رہے کہ گزشتہ ماہ کوئٹہ علاقے مستونگ روڈ پر فرنٹیئر کور (ایف سی) کی چیک پوسٹ کے قریب خودکش دھماکا فورسز کی گاڑی پر کیا گیا تھا۔

پولیس کے مطابق خودکش بمبار موٹر سائیکل پر سوار تھا جبکہ فورسز کی گاڑی شیعہ ہزارہ قبیلے سے تعلق رکھنے والے افراد کو سیکورٹی دے رہی تھی۔ اس واقعے میں 4 افراد ہلاک اور جبکہ 20 افراد زخمی ہوئے تھے۔