چارسدہ میں پولیس چوکی پر دہشت گردوں کا حملہ، 2 اہلکار ہلاک، ایک شدید زخمی

چارسدہ (ڈیلی اردو) صوبہ خیبر پختونخوا کے ضلع چارسدہ کے علاقے ڈھیری زرداد میں دہشت گردوں کی پولیس ناکے پر فائرنگ سے 2 اہلکار ہلاک اور ایک شدید زخمی ہوگیا۔

ڈی پی او چارسدہ سہیل خالد کے مطابق دہشت گردوں کے فائرنگ سے زخمی پولیس اہلکار عمران اور رمیز زحموں کی تاب نہ لاتے ہوئے چل بسے۔

ڈی پی او سہیل خالد کے مطابق زخمی پولیس اہلکار کو ڈی ایچ کیو اسپتال منتقل کردیا گیا اور واقعے کے بعد پولیس کی بھاری نفری نے علاقے کو گھیرے میں لے لیا، ملزمان کی تلاش کیلئے سرچ آپریشن جاری ہے۔

دوسری جانب کالعدم تحریک طالبان پاکستان نے حملے کی ذمہ داری قبول کرتے ہوئے دعوی کیا ہے کہ مجاہدین کے حملے میں دو پولیس اہلکار ہلاک اور تین زخمی ہو گئے۔

چارسدہ کے علاقے ڈھیری زرداد چیک پوسٹ پر دہشتگردوں کا حملہ، 3 پولیس اہلکار زخمی ہوگئے۔#Charsadda #Pakistan

— Shabbir Hussain Turi (@ShabbirTuri) January 21, 2023

خیال رہے کہ 19 جنوری کو خیبرپختونخوا کے قبائلی ضلع خیبر میں تختہ بیگ چیک پوسٹ پر خودکش حملے میں 3 پولیس اہلکار ہلاک جبکہ ایک زخمی ہوگیا تھا۔

ضلع خیبر کے علاقے تختہ بیگ میں دہشت گرد نے پولیس چیک پوسٹ پر دستی بم پھینکنے کے بعد فائرنگ کی اور پھر خود کو دھماکے سے اڑا لیا تھا۔