ڈیرہ اسماعیل خان: سکیورٹی فورسز کی کارروائی میں 2 دہشت گرد ہلاک

ڈیرہ اسماعیل خان (نمائندہ ڈیلی اردو) پاکستان کے شورش زدہ صوبہ خیبرپختونخوا کے ضلع ڈیرہ اسماعیل خان میں سکیورٹی فورسز کی کارروائی کے دوران دو دہشت گرد ہلاک ہوگئے۔

سکیورٹی ذرائع کے مطابق تحصیل کلاچی کے علاقے کھوئی بہارہ میں سکیورٹی فورسز نے انٹیلی جنس بیسڈ آپریشن کیا، جہاں دہشت گردوں کے ساتھ فائرنگ کا تبادلہ ہوا۔

ذرائع کے مطابق فائرنگ کے تبادلے میں دو دہشت گرد ہلاک ہوگئے، جن کی لاشیں جائے وقوع سے برآمد کر لی گئی ہیں۔

سکیورٹی ذرائع کے مطابق ہلاک دہشت گردوں کا تعلق کالعدم تحریک طالبان پاکستان (ٹی ٹی پی) گنڈا پور گروپ سے بتایا جاتا ہے۔

ذرائع کا کہنا ہے کہ کارروائی کے بعد علاقے میں مزید ممکنہ دہشت گردوں کی موجودگی کے پیش نظر سرچ اور کلیئرنس آپریشن جاری ہے۔

حکام کے مطابق ہلاک دہشت گردوں کی شناخت اور ان سے متعلق مزید معلومات اکٹھی کی جا رہی ہیں۔