ڈیرہ اسماعیل خان میں شدت پسندوں کی فائرنگ سے دو ایکسائز اہلکار ہلاک

ڈی آئی خان (نمائندہ ڈیلی اردو) پاکستان کے شورش زدہ صوبے خیبر پختونخوا کے ضلع ڈیرہ اسماعیل خان کے درابن روڈ پر شدت پسندوں کی فائرنگ کے نتیجے میں دو ایکسائز اہلکار ہلاک جبکہ ایک ہوٹل مالک شدید زخمی ہوگیا۔ واقعہ اس وقت پیش آیا جب اہلکار ناشتہ کرنے میں مصروف تھے۔

پولیس کے مطابق فائرنگ کے بعد ہلاک ہونے والے اہلکاروں اور زخمی شخص کو فوری طور پر مفتی محمود ہسپتال منتقل کیا گیا۔ واقعے کی فوری طور پر تحقیقات شروع کر دی گئی ہیں اور پولیس نے جائے وقوعہ سے ابتدائی شواہد اکٹھے کر لیے ہیں۔

ڈی آئی خان پولیس کے ترجمان نے بتایا کہ شدت پسندوں کی تلاش جاری ہے اور قانون کے مطابق سخت کارروائی عمل میں لائی جائے گی۔