ڈی جی آئی اے ای اے کا شام میں کئی ٹن جوہری مواد کی موجودگی کا انکشاف

دمشق(ڈیلی اردو) بین الاقوامی جوہری توانائی ایجنسی کے ڈائریکٹر جنرل رافائل گروسی نے انکشاف کیا ہے کہ شام میں کئی ٹن جوہری مواد موجود ہے، جسے غلط استعمال کیا جا سکتا ہے۔

رافائل گروسی نے دمشق کے دورے کے دوران بتایا کہ ایجنسی کے معائنہ کاروں نے دو مقامات کا جائزہ لیا، جن میں ایک دیر الزور میں واقع ہے جبکہ دوسرا وہ مقام ہے جس کے بارے میں شام نے حال ہی میں ایجنسی کو اطلاع دی تھی۔

گروسی کے مطابق شام کی جانب سے غیر اعلانیہ مقام اور وہاں موجود مواد سے متعلق معلومات فراہم کرنا ایک اہم قدم ہے۔ انہوں نے کہا کہ دریافت ہونے والا جوہری مواد سابق صدر بشار الاسد کے دور سے متعلق ہے اور اسے بین الاقوامی نگرانی میں رکھنے کی کوشش کی جائے گی۔

شام کے وزیر خارجہ اسعد الشیبانی نے بتایا کہ دمشق نے 17 جولائی کو رضاکارانہ طور پر ایجنسی کو خفیہ مقام پر موجود مواد کے بارے میں آگاہ کیا تھا۔ ان کے مطابق تکنیکی جائزوں سے معلوم ہوا ہے کہ یہ مواد خطرناک نوعیت کا نہیں اور ایجنسی کی نگرانی میں شام کے پاس رہے گا۔

رافائل گروسی نے دیر الزور کے اس مقام کا بھی دورہ کیا جو تقریباً 18 سال سے بند ہے۔ اسرائیل نے 2007 میں اس مقام پر فضائی حملہ کیا تھا، جبکہ جوہری توانائی ایجنسی نے 2011 میں اسے ممکنہ طور پر جوہری ری ایکٹر قرار دیا تھا جس کی تعمیر میں شمالی کوریا کی معاونت کا شبہ ظاہر کیا گیا تھا۔

گروسی کے مطابق تازہ دریافتیں شام کے سابق جوہری پروگرام سے متعلق ایجنسی کے دیرینہ شکوک کو تقویت دیتی ہیں، جبکہ دیر الزور میں مزید کھدائی اور تحقیقات کا عمل جاری ہے۔