کابل : نجی تعلیمی ادارے کے سامنے دھماکہ ، طلبہ سمیت 30 افراد زخمی

کابل(ڈیلی اردو) افغانستان کے دارالحکومت کابل کے علاقے دشتِ برچی میں ایک تعلیمی ادارے کے قریب دھماکے کے نتیجے میں تقریباً 30 افراد زخمی ہوگئے، جن میں زیادہ تعداد طالبات کی بتائی جاتی ہے۔

مقامی ذرائع کے مطابق دھماکا پیر کی شام تقریباً ساڑھے 4 بجے شہرک مهدیہ میں واقع شمع ہدایت اسکول اور نجی تعلیمی مرکز کے سامنے ہوا۔ دھماکے کے بعد متعدد طلبہ و طالبات زخمی ہوئے۔

ذرائع کا کہنا ہے کہ زخمیوں میں بیشتر طالبات شامل ہیں جو تعلیمی ادارے سے باہر نکل رہی تھیں۔ متاثرین کو علاج کے لیے استقلال، عالمی اور ایمرجنسی اسپتال منتقل کیا گیا۔

ابتدائی اطلاعات میں زخمیوں کی تعداد کم بتائی گئی تھی، تاہم بعد ازاں مقامی ذرائع نے تعداد تقریباً 30 تک پہنچنے کی اطلاع دی ہے۔

تاحال دھماکے کی نوعیت، اس کے محرکات اور ذمہ داروں سے متعلق سرکاری سطح پر کوئی واضح بیان سامنے نہیں آیا۔

دشتِ برچی میں ماضی میں بھی متعدد دھماکے اور حملے ہوچکے ہیں، جن میں عام شہریوں اور خصوصاً تعلیمی اداروں سے وابستہ افراد کو نشانہ بنایا گیا ہے۔