کراچی سے حزب الاحرار کے چار دہشت گرد گرفتار، دستی بم اور اسلحہ برآمد

کراچی (ڈیلی اردو) سندھ رینجرز اور پولیس نے مشترکہ کارروائی کرتے ہوئے کراچی کے علاقے منگھو پیر سے بھتہ خوری میں ملوث کالعدم تنظیم حزب الاحرار کے چار دہشت گردوں کو گرفتار کرلیا۔

تفصیلات کے مطابق رینجرز اور پولیس نے انٹیلی جنس معلومات کی بنیاد منگھوپیر میں مشترکہ کارروائی کرتے ہوئے بھتہ خوری میں ملو ث کالعدم ٹی ٹی پی حزب الاحرار کے 4 دہشت گرد گرفتار کرلئے۔

ترجمان رینجرز نے بتایا کہ گرفتار ملزمان میں قاری عالمگیر، محمد زاہد عرف قاری، محمد کاشف عرف کاشی اور محمد یوسف شامل ہیں، ملزمان کے قبضے سے ہینڈ گرنیڈ اور غیر قانونی اسلحہ برآمد ہوا۔

ترجمان رینجرز کا کہنا ہے کہ ابتدائی تفتیش کے دوران ملزمان نے اہم انکشافات کیے، ملزمان کراچی کے مختلف علاقوں سے کاروباری شخصیات کی تفصیلات حاصل کرتے تھے، تاجروں کے موبائل فون، کاروباری جگہیں، گھروں اور ٹرانسپورٹ کی ویڈیو بناتے تھے، معلومات افغانستان میں موجود حزب الاحرار (کالعدم ٹی ٹی پی اور مہمند گروپ)کے کمانڈر محمد شعیب عرف جان نثار کو فراہم کرتے تھے۔

ترجمان کا کہنا ہے کہ حزب الاحرار کمانڈر محمد شعیب عرف جان نثار نے رواں ماہ میں مختلف ٹرانسپورٹرز کی گاڑیوں کو نذر آتش کرنے کا بھی حکم دیا تھا۔

ترجمان رینجرز کا کہنا ہے کہ ملزمان کے دیگر ساتھیوں کی گرفتاری کے لیے چھاپے مارے جا رہے ہیں، گرفتار ملزمان کو بمعہ اسلحہ و ایمونیشن مزید قانونی کاروائی کے لیے پولیس کے حوالے کر دیا گیا۔