کراچی میں انٹیلی جنس اداروں کا آپریشن، القاعدہ اور ٹی ٹی پی کے 5 شدت پسند گرفتار

واشنگٹن (ش ح ط) پاکستان کے صوبے سندھ میں کاؤنٹر ٹیررازم ڈیپارٹمنٹ (سی ٹی ڈی) سیکورٹی فورسز اور انٹیلی جنس اداروں نے منگھوپیر اور کشمیر روڈ کے علاقوں میں خفیہ اطلاعات کی بنیاد پر کارروائی کرتے ہوئے اہم آپریشن کیا۔

اس دوران ایک اور آپریشن میں کالعدم تحریک طالبان پاکستان (ٹی ٹی پی) کے دو دہشت گرد اللہ نور اور سرفراز کو گرفتار کیا گیا۔ آپریشن میں مزید تین شدت پسند بھی پکڑے گئے جن کی شناخت سلیم، جہانزیب اور امداد اللہ کے نام سے ہوئی ہے، جو حکام کے مطابق القاعدہ کے نیٹ ورک سے منسلک ہیں۔

ترجمان سی ٹی ڈی کے مطابق گرفتار دہشت گرد پڑوسی ملک سے عسکری تربیت یافتہ ہیں اور کراچی میں دہشت گردی کی منصوبہ بندی کر رہے تھے۔ کارروائی کے دوران ان کے قبضے سے غیر قانونی اسلحہ بھی برآمد ہوا، جو فارنزک ٹیسٹ کے لیے بھیج دیا گیا۔

سی ٹی ڈی کے ترجمان نے بتایا کہ ملزمان کے خلاف تھانہ سی ٹی ڈی میں مقدمات درج کر دیے گئے ہیں اور مزید تحقیقات جاری ہیں۔