کراچی میں سی ٹی ڈی موبائل پر دستی بم حملہ، 2 اہلکار شدید زخمی

کراچی (نمائندہ ڈیلی اردو) پاکستان کے صوبہ سندھ کے دارالحکومت کراچی کے علاقے گلشن اقبال بلاک 7 میں نجی یونیورسٹی کے قریب کاؤنٹر ٹیررازم ڈیپارٹمنٹ (سی ٹی ڈی) کی موبائل پر دستی بم حملے میں 2 اہلکار شدید زخمی ہو گئے۔

ابتدائی اطلاعات کے مطابق نامعلوم دہشت گردوں نے سی ٹی ڈی کی موبائل کو دستی بم حملے کا نشانہ بنایا، جس کے بعد حملہ آوروں کی جانب سے فائرنگ بھی کی گئی۔ حملے کے نتیجے میں دو اہلکار شدید زخمی ہوئے، جنہیں فوری طبی امداد کے لیے اسپتال منتقل کیا جا رہا ہے۔

پولیس کے مطابق دستی بم حملے سے سی ٹی ڈی کی موبائل گاڑی کا پچھلا حصہ تباہ ہو گیا۔

واقعے کی اطلاع ملتے ہی پولیس اور دیگر قانون نافذ کرنے والے اداروں کی بھاری نفری جائے وقوعہ پر پہنچ گئی اور علاقے کو گھیرے میں لے لیا گیا۔

سیکیورٹی اہلکاروں نے شواہد اکٹھے کرنا شروع کر دیے ہیں جبکہ حملہ آوروں کی تلاش اور واقعے کی تحقیقات جاری ہیں۔