کراچی میں سی ٹی ڈی کی کارروائی، سپاہ محمد سے وابستہ مبینہ ٹارگٹ کلر گرفتار

کراچی(ڈیلی اردو) کاؤنٹر ٹیررازم ڈیپارٹمنٹ (سی ٹی ڈی) کراچی نے وفاقی سول حساس ادارے کے ساتھ مشترکہ کارروائی کرتے ہوئے کالعدم تنظیم سپاہ محمد سے وابستہ مبینہ ٹارگٹ کلر سید محمد عسکری عابدی کو گرفتار کرلیا۔

سی ٹی ڈی حکام کے مطابق کارروائی کے دوران گرفتار ملزم کے قبضے سے ایک ہینڈ گرینیڈ اور ایک کلاشنکوف برآمد ہوئی۔ ملزم کا نام سی ٹی ڈی کی ریڈ بک کے دسویں ایڈیشن میں انتہائی مطلوب افراد کی فہرست میں شامل بتایا گیا ہے۔

حکام کے مطابق ملزم کافی عرصے سے روپوش تھا اور کراچی میں دوبارہ اپنا نیٹ ورک فعال کرنے کی کوشش کر رہا تھا۔ ابتدائی تفتیش میں اس کے مختلف ٹارگٹ کلنگ اور دہشتگردی کے واقعات میں ملوث ہونے کے شواہد سامنے آنے کا دعویٰ کیا گیا ہے۔

سی ٹی ڈی کے مطابق ملزم نے دورانِ تفتیش اپنے ساتھیوں کے ہمراہ مختلف وارداتوں میں ملوث ہونے کا اعتراف کیا اور بتایا کہ واردات سے قبل اہداف کی نگرانی اور ریکی کی جاتی تھی۔

حکام کے مطابق ملزم کے خلاف کراچی کے مختلف تھانوں میں ٹارگٹ کلنگ کے مقدمات پہلے سے درج ہیں، جبکہ حالیہ کارروائی کے بعد بھی اس کے خلاف ایکسپلوسوز ایکٹ، انسداد دہشتگردی ایکٹ اور سندھ آرمز ایکٹ کے تحت مقدمات درج کیے گئے ہیں۔

سی ٹی ڈی حکام کا کہنا ہے کہ گرفتار ملزم سے مزید تفتیش جاری ہے اور اس کے مبینہ ساتھیوں اور سہولت کاروں تک پہنچنے کے لیے کارروائیاں کی جا رہی ہیں۔