کراچی: ٹارگٹ کلنگ میں ملوث زینبیون بریگیڈ کے چار دہشت گرد گرفتار

واشنگٹن (ش ح ط) پاکستان کے صوبہ سندھ کے صوبائی  دارالحکومت کراچی میں کاؤنٹر ٹیررازم ڈیپارٹمنٹ (سی ٹی ڈی) نے کارروائی کرتے ہوئے ایرانی حمایت یافتہ کالعدم تنظیم زینبیون بریگیڈ سے تعلق رکھنے کے الزام میں چار مبینہ دہشت گردوں کو گرفتار کر لیا ہے۔

سی ٹی ڈی کے مطابق گرفتار افراد حالیہ دنوں میں کراچی میں ہونے والی ٹارگٹ کلنگ کی متعدد وارداتوں میں ملوث رہے ہیں۔ 

سی ٹی ڈی کا کہنا ہے کہ ابتدائی تحقیقات میں یہ بات بھی سامنے آئی ہے کہ ملزمان ماضی میں گرفتار ہونے والے دہشت گردوں کی سہولت کاری میں بھی شامل رہے ہیں۔

سی ٹی ڈی کے مطابق کارروائی کے دوران ملزمان کے قبضے سے اسلحہ بھی برآمد کیا گیا ہے جبکہ ان سے مزید تفتیش جاری ہے، جس کے دوران مزید انکشافات متوقع ہیں۔

واضح رہے کہ پاکستان کی وزارت داخلہ نے مارچ 2024 میں زینبیون بریگیڈ کو باضابطہ طور پر ایک دہشت گرد تنظیم قرار دے کر اس پر پابندی عائد کی تھی۔

وزارت داخلہ کے مطابق تنظیم کے ملک کے امن اور سلامتی کے خلاف سرگرمیوں میں ملوث ہونے کے شواہد موجود تھے۔

اس سے قبل حکومت پاکستان دو دیگر تنظیموں پر بھی پابندی عائد کر چکی ہے، جن پر الزام تھا کہ وہ پاکستانی شیعہ نوجوانوں کو بیرونِ ملک، خصوصاً شام، لڑنے کے لیے بھیجنے میں ملوث ہیں۔ ان میں انصارالحسین (دسمبر 2016) اور خاتم الانبیا (اگست 2020) شامل ہیں۔

جنوری 2024 میں سندھ سی ٹی ڈی نے زینبیون بریگیڈ سے وابستہ ایک مشتبہ عسکریت پسند سید محمد مہدی کو گرفتار کیا تھا، جو 2019 میں کراچی میں معروف مذہبی عالم مفتی تقی عثمانی پر قاتلانہ حملے میں ملوث تھا۔ اس حملے میں مفتی تقی عثمانی کے دو محافظ ہلاک ہو گئے تھے۔

جولائی 2022 میں اُس وقت کے وفاقی وزیر داخلہ رانا ثناء اللہ خان نے سینیٹ کو بتایا تھا کہ زینبیون بریگیڈ کے اراکین 2019 سے 2021 کے دوران ملک میں مختلف دہشت گردی کی سرگرمیوں میں سرگرم پائے گئے تھے۔