کراچی: 7 محرم کے جلوس کا عَلم بجلی کے تاروں سے ٹکرا گیا، 4 عزادار جاں بحق، 3 زخمی

کراچی (ڈیلی اردو) کراچی کے علاقے گلستان جوہر بھٹائی آباد میں 7 محرم الحرام کے جلوس کا عَلم بجلی کے تاروں میں ٹکرا گیا جس کے نتیجے میں 4 عزادار جاں بحق ہوگئے۔

گلستان جوہر کے علاقے بھٹائی آباد میں واقع امام بارگاہ کے قریب 7 محرم الحرام کے جلوس کیلئے ’علم‘ تیار کیا جارہا تھا کہ اس دوران علم بجلی کی تاروں سے ٹکراگیا۔

علم تاروں سے ٹکرانے کے نتیجے میں 4 عزادار کرنٹ سے جھلس گئے جنہیں طبی امداد کیلئے قریبی نجی اسپتال لے جایا گیا تاہم وہ جانبر نہ ہوسکے۔

ریسکیو اداروں اور مقامی پولیس نے 4 افراد کے جاں بحق ہونے کی تصدیق کرتے ہوئے بتایا کہ جاں بحق افراد کی شناخت محمد علی، حاجی آغا، 13 سالہ خاصخیلی اور 18 سالہ سونو شاہ ذیب سے کر لی گئی ہے۔

زخمی افراد میں سمیر جس کی عمر 14 سال، افضل آغا عمر جس کی عمر 22 سال اور محسن شاہ جس کی عمر 19 سال ہے کو ہسپتال منتقل کردیا گیا ہے۔ اور لاشوں کو جناح ہسپتال منتقل کیا جارہا ہے۔

ہسپتال ذرائع کا کہنا ہے کہ واقعے میں زخمی ہونے والے ایک شخص کی حالت تشویش ناک ہے۔

ترجمان کے الیکٹرک نے بھٹائی آباد میں پیش آنے والے واقعے پر شدید افسوس کا اظہار کیا ہے۔

ترجمان نے کہا کہ علم کے بجلی کے تاروں سے ٹکرانے کے سبب حادثہ پیش آیا، شہری جلوس کے دوران خصوصی احتیاط برتیں، بجلی کے تار قواعد و ضوابط کےمطابق نصب کئے جاتے ہیں۔