کرم، اورکزئی اور جنوبی وزیرستان میں سیکورٹی فورسز پر حملے، پانچ ہلاک، کئی زخمی

واشنگٹن (ش ح ط) پاکستانکے شورش زدہ صوبے خیبر پختونخوا کے اضلاع کرم، اورکزئی اور جنوبی وزیرستان میں سیکیورٹی فورسز پر یکے بعد دیگرے حملوں اور دھماکوں میں کم از کم دو اہلکار ہلاک، متعدد زخمی جبکہ جوابی کارروائی میں دو حملہ آور بھی مارے گئے ہیں۔

سرکاری ذرائع کے مطابق سینٹرل کرم کے علاقے ڈوگر میں جوگی قلعہ کے مقام پر پاکستانی طالبان نے سیکیورٹی فورسز پر حملہ کیا۔ فائرنگ کے تبادلے میں دو اہلکار ہلاک اور کئی زخمی ہوئے، جبکہ جوابی کارروائی میں دو دہشت گرد مارے گئے جن میں سے ایک کی شناخت شاہین کے نام سے ہوئی ہے۔

حملے کے بعد سیکیورٹی فورسز کی بھاری نفری موقع پر پہنچ گئی اور علاقے کو گھیرے میں لے کر سرچ آپریشن شروع کر دیا۔

جوگی قلعہ، کرم اور اورکزئی کی سرحد پر واقع ایک اہم اسٹریٹیجک مقام سمجھا جاتا ہے، جہاں ماضی میں بھی جھڑپیں ہو چکی ہیں۔

ادھر اورکزئی میں پولیس چیک پوسٹ کے قریب آئی ای ڈی دھماکہ ہوا۔ ڈسٹرکٹ پولیس آفیسر شوکت علی کے مطابق یہ واقعہ اپر اورکزئی کے علاقے کڑاپہ میں پیش آیا۔

دھماکے سے کوئی جانی نقصان نہیں ہوا تاہم چیک پوسٹ کی چار دیواری کو جزوی نقصان پہنچا۔ پولیس کی نفری نے موقع پر پہنچ کر علاقے کا محاصرہ کر کے تفتیش شروع کر دی ہے۔

دوسری جانب جنوبی وزیرستان کے وانا میں توئی خولہ کے علاقے کوٹکی گومل کے ٹو اور کوٹ اعظم پوسٹ پر بھی دہشتگردوں نے حملہ کیا۔

ذرائع کے مطابق سیکیورٹی فورسز اور حملہ آوروں کے درمیان بھاری ہتھیاروں سے فائرنگ کا تبادلہ جاری ہے، تاہم فوری طور پر کسی جانی نقصان کی اطلاع نہیں ملی۔

سیکیورٹی حکام کے مطابق حالیہ دنوں میں ان علاقوں میں شدت پسندوں کی سرگرمیوں میں اضافہ دیکھا جا رہا ہے، جس کے باعث سرحدی اضلاع میں الرٹ لیول بلند کر دیا گیا ہے۔