کرم حملوں میں ملوث کمانڈر کاظم سمیت 14 دہشتگردوں کے سر کی قیمت مقرر

پشاور (نمائندہ ڈیلی اردو) خیبرپختونخوا کے محکمہ داخلہ نے قبائلی ضلع کرم میں دہشت گردوں کے سروں کی قیمت مقرر کردی۔

اعلامیے کے مطابق 14دہشت گردوں کے سروں کی قیمت 13 کروڑ 30 لاکھ روپے مقرر کی گئی ہے۔

محکمہ داخلہ کے مطابق کالعدم تحریک طالبان پاکستان کے کمانڈر کاظم کے سر کی قیمت 3 کروڑ روپے مقرر کی گئی۔

نوٹی فکیشن کے مطابق دہشت گرد امجد اللہ کے سر کی قیمت 2 کروڑ، مکرم خان کے سر کی قیمت ڈیڑھ کروڑ، درویش وزیر کے سر کی قیمت ایک کروڑ روپے مقرر کی گئی ہے۔

مزید کہا گیا ہے کہ مطلوب دہشت گرد منصور، اسامہ، آدم ساز، یاسین، وزیر محمود کے سر کی قیمت 30، 30 لاکھ روپے مقرر کی گئی ہے۔

دہشت گرد سیف اللہ، اسامہ عرف شفیق، نور اللہ کے سر کی قیمت ایک، ایک کروڑ روپے مقرر کی گئی ہے۔ اسی طرح عثمان کے سر کی قیمت 80 لاکھ روپے مقرر کی گئی ہے۔

یاد رہے کہ ہے سوموار کے روز ضلع کرم میں قافلے پر فائرنگ کے نتیجے میں پانچ سکیورٹی اہلکاروں سمیت 9 افراد ہلاک ہوئے تھے جس کے بعد صوبائی حکومت نے شر پسند عناصر کے خلاف کارروائی کا اعلان کیا تھا۔

بیان میں کہا گیا ہے کہ ان دیہات کو خالی کروا کے سرچ آپریشنز کیے جائیں گے۔

حکومت کا کہنا ہے کہ کرم میں ریاست کے خلاف کارروائیوں میں ملوث افراد کو شیڈول فور میں ڈالا جائے گا جب کہ بدامنی میں ملوث افراد اور ماسٹر مائنڈز کے سروں کی قیمت بھی مقرر جائے گی۔

خیبر پختونخوا کی حکومت نے ضلع کرم میں قافلے پر فائرنگ کے واقعے میں ملوث عناصر کے خلاف کارروائی سے قبل لوئر کرم کے چار گاؤں اوچت، مندوری، داد کمر اور بگن کو خالی کروانے کا فیصلہ کیا ہے۔

صوبائی حکومت کی جانب سے جاری بیان میں کہا گیا کہ ان دیہات کو خالی کروانے کا فیصلہ عوام کی جان و مال کے تحفظ کو یقینی بنانے کے لیے لیا گیا ہے۔

واضح رہے کہ 17 فروری کو ضلع کرم میں شدت پسندوں اور مقامی شہریوں کے حملوں کے بعد امدادی قافلے کو بچانے کی کوششوں میں 5 سیکیورٹی اہلکار ہلاک ہوگئے تھے۔ جبکہ دیگر چار اہلکاروں اور ٹرک ڈرائیوروں سمیت 15 افراد زخمی ہوگئے تھے۔